Дар ҷаласаи ҳарду палатаи парлумони Ӯзбекистон рӯзи 14 декабр номзадии Абдулло Орипов ба мансаби нахуствазири ин кишвар тасдиқ карда шуд.
Бино ба иттилои Uzdaily.Uz, ӯро ба вакилон президенти Ӯзбекистон Шавкат Мирзиёев муаррифӣ кардааст. Дар навбати худ Абдулло Орипов вакилонро бо барномаи кории дарозмуддат ва кӯтоҳмуддати худ шинос кардааст.
Қобили зикр аст, ки номзадии Абдулло Орипов ба ин мансабро Шӯрои сиёсии Ҳаракати соҳибкорон ва тоҷирон – Ҳизби либералӣ-демократии Ӯзбекистон пешбарӣ карда буд.
Абдулло Орипови 55-сола муддати 10 сол – аз соли 2002 то соли 2012 ба ҳайси муовини нахуствазири Ӯзбекистон кор кардааст. Тирамоҳи соли 2012 Прокуратураи генералии Ӯзбекистон нисбати ӯ дар робита ба ғайриқонунӣ иҷозатнома додан ба насби мавҷафканҳои иловагӣ барои эҳтиёҷоти ширкати «Ӯздунробита» (тамғаи «МТС-Ӯзбекистон») парвандаи ҷиноӣ боз намуда, вале тафтишоти ин қазия бо чӣ анҷомид, маълум нест.
Санаи 22 августи соли 2012 Орипов аз мансаби роҳбари ниҳод оид ба масоили низомҳои итиилоотӣ ва телекоммуникатсия сабукдӯш шуда, ному насаби ӯ аз сомонаи ҳукумат хориҷ шуд. Баъди чанд ҳафтаи даргузашти Ислом Каримов (нахустин президенти Ӯзбекистон, 2 сентябр) иҷрокунандаи вазифаи президенти Ӯзбекистон Шавкат Мирзиёев ӯро ба ҳайати ҳукумат баргардонида, ба вазифаи муовини нахуствазир, роҳбари ниҳод оид ба масоили сиёсати ҷавонон, фарҳанг, низомҳои иттилоотӣ ва телекоммуникатсия таъин кард.
Абдулло Орипов санаи 24 майи соли 1961 таваллуд шуда, миллаташ ӯзбек аст. Соли 1983 Донишкадаи электротехникии алоқаи Тошкандро хатм кардааст, номзади илмҳои иқтисодӣ. Оиладор, соҳиби панҷ духтар. Бо орденҳои «Дӯстлик» ва «Меҳнат шуҳрати» мукофотонида шудааст.
