Барои амалисозии барномаи миёнамуҳлати рушд Тоҷикистон ба кумак аз ҷониби ниҳодҳои молии байнулмилалӣ умедвор аст. Баҳри татбиқи ин санад то соли 2020 ҳамасола 5 млрд. долларӣ маблағ зарур аст.
Барои таъмини амалисозии афзалиятҳои барнома таҳиягарони он (Вазорати рушди иқтисод) ба ҳамаи сарчашмаҳои маблағгузорӣ такя карда, сарчашмаи асосии молиявӣ – воситаҳои буҷети давлатӣ ва ҳамчунин буҷетҳои маҳаллӣ ва сармоягузорон дониста мешаванд.
«Дар муқоиса бо стратегияҳои пешини миёнамуҳлат, дар маблағгузории барномаи мазкур сармоягузориҳои хусусӣ – ҳам мустақиман хориҷӣ ва ҳам сармоягузории дохилӣ нақши муҳим доранд», – қайд мешавад дар санад.
Ғайр аз ин, сарчашмаи муҳими дигар воситаҳои қарзии ташкилотҳои бисёрсоҳа (ниҳодҳои молии байнулмилалӣ) хоҳанд шуд, ки истифодаи онҳо барои рӯйпӯш кардани касри буҷет пешбинӣ шудааст.
«Барои беҳбуди вазъи баргардонидани қарзи хориҷӣ ҷалби дастгирии беруна тавре сурат хоҳад гирифт, ки хатарҳои молӣ бартараф карда шаванд. Ҳамзамон пешбинӣ мешавад, ки шарикон оид ба рушд маблағгузориро аз ҳисоби воситаҳои грантӣ зиёд мекунанд», – зикр мегардад дар барнома.
Барои амалисозии барнома дар маҷмӯъ 25 млрд. доллари ИМА маблағ зарар буда, ҳиссаи захираҳои буҷетӣ – 13,5 млрд., сармоягузориҳо – 9 млрд. ва воситаҳои шарикон оид ба рушд – 2,5 млрд. доллари ИМА-ро ташкил медиҳанд.
Муаллифони санад таъкид мекунанд, ки барои амалисозии ҳамаи афзалиятҳо, бахусус дар самти рушди устувор, воситаҳои сарчашмаҳои зикршуда нокофӣ хоҳанд буд. «Дар ин робита ҳукумат ба дастгирии афзалиятҳои барнома дар доираи ташаббусҳои нави Ҳадафҳои рушди устувор умедвор аст», – қайд мекунанд онҳо.
Дар ин санад гуфта мешавад, ҳукумат ба шарикон оид ба рушд ҷиҳати баргузор намудани гуфтушунидҳо муроҷиат мекунад, то ки аз афзалиятҳои тасдиқшудаи барномаи дастгирӣ шавад.
Тӯли солҳои соҳибистиқлолии Тоҷикистон ниҳодҳои молии байнулмилалӣ ба ҷумҳурӣ ба сифати қарзу грант ва кумаки техникӣ миллиардҳо доллар кумак карданд.
Ташкилоти мададрасони асосии Тоҷикистон Бонки осиёгии рушд мебошад, ки то имрӯз ба ҷумҳурӣ дар ҳаҷми ҳудуди 1,5 млрд. доллари ИМА кумак кардааст.
Бино ба маълумоти Вазорати молияи ҷумҳурӣ, айни замон ҳаҷми умумии қарзи Тоҷикистон назди ниҳодҳои байнулмилалии молӣ тақрибан 790 млн. доллари ИМА-ро ташкил медиҳад.
