Аз 28 январи соли равон инҷониб бар асари боришоти аз меъёр зиёди барф, аз километри 48 то 73-юми роҳи Душанбе – Чанок (55 километр), дар якчанд мавзеъ тармафароӣ ба амал омад, ки теъдоди тармаҳо зиёда аз 50 адад буда, баландии ҳар кадомаш зиёда аз 10 метрро ташкил дод.
Бино ба маълумоти маркази матбуоти филиали Ширкати саҳомии «Инновейтив Роуд Солюшнз ЛТД» дар ҶТ, зиёда аз 30 техникаи пуриқтидори филиали Ширкати «IRS» ба ин қитъа сафарбар шуда, дар заминаи фаъолияти шабонарӯзӣ тармаҳо бартараф ва бо кӯмаки техника ва кормандони «IRS» нақлиёту мусофирони ба мушкил мувоҷеҳ шуда аз банди барф озод шуданд.
Ёдрас мешавад, ки имрӯз низ боришоти шадид ва тармафароӣ идома ёфта, дар километрҳои 65 ва 69 тармаҳои калонҳаҷм фаромада, ҳаракати нақлиётро қатъ намуд. Айни замон техникаҳои пуриқтидор ба макони офат сафарбар шуда, бартарафсозии тармаҳо босуръат идома дорад.
Дар робита ба ин, «IRS» таъкид менамояд, ки бинобар вазъи кунунии роҳ шаҳрвандон муваққатан аз сафар тариқи роҳи мазкур худдорӣ намоянд.
Маълумоти бештар дар ин мавзӯъро аз сомонаи расмии ширкат бо суроғаи www.irs.tj дарёфт карда метавонед.
