Ба муносибати фарорасии 25-умин солгарди барпо намудани робитаҳои дипломатӣ миёни Душанбе ва Анқара сарони кишварҳои Тоҷикистону Туркия ба ҳамдигар барқияҳои табрикӣ ирсол намуданд.
Бино ба иттилои хадамоти матбуоти сарвари давлат, дар барқияи президенти Тоҷикистон Эмомалӣ Раҳмон қайд мешавад, ки тайи ин давра бар асари талошҳои муштарак ҳамкориҳои ду кишвар дар ҳавзаҳои сиёсӣ, иқтисодӣ, фарҳангӣ ва дигар соҳаҳои мавриди таваҷҷуҳи тарафайн бемайлон густариш ёфта, зинаҳои нави болотарро касб карданд.
«Дар ин раванд усулҳои пазируфташуда ва халалнопазири дӯстии пойдор, баробарҳуқуқӣ ва эътимоду эҳтироми мутақобила хоси робитаҳои созандаи Тоҷикистону Туркия буданд, – таъкид мешавад дар барқияи Эмомалӣ Раҳмон. – Тоҷикистон ҷонибдори таҳкиму тавсеаи муносибатҳои дарозмуддати дӯстона бо Туркия мебошад ва ин мавқеъ созгори усули умдаи сиёсати хориҷии мост».
Дар барқияи табрикии президенти Туркия Реҷеп Тайип Эрдоган итминони комил изҳор мешавад, ки муносибатҳои ҳарду кишвар, ки бо равобити фарҳангиву таърихӣ ва дар асоси эҳтироми тарафайн, баробариву манфиати муштарак бунёд ёфтаанд, дар оянда низ рушд хоҳанд кард.
«Дар ин масир бори дигар таъкиди иродаи онро дорам, ки дар якҷоягӣ бо кишвари дӯсту бародари Тоҷикистон ояндаи дурахшонро бунёд хоҳем кард», – омадааст дар барқияи сарвари давлати Туркия.
