Зимни посух ба саволҳои журналистон рӯзи 28 феврал раиси ВМКБ Шодихон Ҷамшед изҳор намуд, ки барои раҳоии вилоят аз кумаки молии давлатӣ (дотатсия), ки имрӯз ҳудуди 80%-ро ташкил медиҳад, дар буҷет се манбаъи имконпазир вуҷуд дорад.
Ба гуфтаи ӯ, яке аз ин сарчашмаҳо рушди сайёҳӣ (туризм) буда, ин соҳа маблағгузории зиёдро талаб намекунад ва дар муҳалти кӯтоҳ ба буҷет даромадҳои иловагӣ оварда метавонад.
«Табиати Бадахшон барои сайру саёҳат офарида шуда, барои рушди ин бахш танҳо дар густариши маъракаи таблиғ (рекалама) ва беҳбуди сифати хизматгузорӣ кӯшиш ба харҷ додан зарур аст», – қайд кард раиси вилоят.
Бино ба маълумоти ӯ, соли гузашта беш аз 400 ҳазор сайёҳон аз Тоҷикистон боздид намуда, аз ин миқдор ба ВМКБ ҳамагӣ ҳудуди 3 ҳазор нафар рост меояд.
«Агар ин шумор ҳаддди ақал то 100 ҳазор нафар расонида шавад, пас худатон тасаввур кунед, ки чӣ қадар фоида метавон ба даст овард», – зикр кард номбурда.
Сарчашмаи дигари афзоиши даромад ба буҷети вилоятро Шодихон Ҷамшед рушди саноати кӯҳкорӣ унвон кард.
«Баҳри рушди ин соҳа ҳукумат санадҳои дахлдори қонунгузорӣ қабул карда, соли гузашта барои корҳои иктишофӣ дар 17 кони тиллои пошида иҷозатнома дода шуд, ки сокинони маҳаллиро ба кӯшишу ташаббусҳо дар ин самт водор месозад, – гуфт ӯ. – Барои коркарди дигар конҳо маблағгузориҳои зиёд ва захираҳои энергетикӣ зарур аст».
Зимнан зикр гардид, ки манбаи сеюми даромади иловагӣ барои буҷети ВМКБ имконоти энергетикии вилоят аст.
«Мувофиқи ҳисобу китоби мутахассисон, захираи обиву энергетикии мо ба 6,7 млрд. кВт/соат баробар аст, – гуфт раиси вилоят. – Имрӯз бошад, дар вилоят ҳамагӣ 171 млн. кВт/соат нерӯи барқ истеҳсол мешавад».
