Президенти Тоҷикистон Эмомалӣ Раҳмон дар робита ба ҳамлаи силоҳбадастон ба бемористони низомӣ дар шаҳри Кобул ба Раисҷумҳури Ҷумҳурии Исломии Афғонистон Муҳаммад Ашраф Ғанӣ барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон аз ҷумла қайд мешавад, ки «хабари фоҷеабори ба ҳалокат расидан ва захмӣ шудани даҳҳо шаҳрвандони кишвари дӯсти Афғонистон бар асари ҳамлаи силоҳбадастон ба бемористони низомӣ дар шаҳри Кобул боиси андуҳ ва нафрати беандозаи мо гардид».
«Мо ин амали ғайриинсонии интиҳориёнро шадидан маҳкум карда, бори дигар зарурати муборизаи беамону муташаккилонаи дастаҷамъонаро алайҳи терроризм ва ифротгароӣ қотеона таъкид менамоем», – омадааст дар барқия.
Дар фарҷом Эмомалӣ Раҳмон ба наздикону пайвандони қурбоншудагон ҳамдардиву тасаллияти амиқи хешро изҳор намуда, ба ҳамаи осебдидагон шифои комил хостааст.
