Чанде пеш намояндагони ҷомеаи шаҳрвандии кишварҳои Осиёи Марказӣ ва Русия дар шабакаи интернет муроҷиатнома ба раҳбарияти Русия ва кишварҳои Осиёи Марказиро ба нашр расониданд.
Дар муроҷиатнома аз сиёсатмадорон ва мансабдорон даъват мешавад, ки аз изҳороти беасоси сартосарӣ гунаҳкор кардани муҳоҷирон ба ин амали террористӣ худдорӣ варзанд. Аз ҷумла муаллифони муроҷиатнома изҳороти роҳбари Хадамоти федералии амният Александр Бортников дар бораи он ки муҳоҷирони корӣ аз кишварҳои ИДМ асоси гурӯҳҳои террористиро ташкил медиҳанд, мисол овардаанд.
«Мо нисбати риоя нашудани ҳуқуқҳои ҳамватанони худ, ки аксаран дар шароити ғуломона зиндагӣ доранду танҳо барои рӯзгузаронии оилаҳои дар ватан мондаи худ кор мекунанд, бетараф буда наметавонем», – зикр шудааст дар изҳорот.
Зери ин муроҷиатнома алҳол 160 нафар имзо гузоштаанд, ки миёни онҳо ҳамватанони мо – коргардони маъруф Барзу Абдураззоқов ва роҳбари Созмони ҷамъиятии минтақавии мусоидат ба ҳимояи ҳуқуқи муҳоҷирон «Маркази ҳуқуқи инсон» Иззат Амон низ ҳузур доранд.
Барзу Абдураззоқов:
– Ман муроҷиатномаро дарҳол баъди аз Маскав ва Петербург омаданам имзо кардам. 10 рӯзе, ки ман дар Питер ҳузур доштам, ҳамарӯза медидам, ки издиҳоми ҳамватанони моро кормандони милитсия дар ҷое нигоҳ медоранд. Барои чӣ? Барои он ки гӯё (вале ҳоло чизе исбот нашудааст) кадом як тоҷике ба амали террористӣ дар метро даст дорад? Шумо боре дидаед, ки барои содир кардани ҷиноят аз ҷониби чечен ё арманӣ, издиҳоми онҳоро беҳуда ҷое нигоҳ доранд?
Вақте ман аз Маскав ба Алмаато (Питер-Маскав-Алмаато) меомадам, маро дар гузаргоҳи тафтиши шиноснома боздошта, ба ҳуҷрае дароварданд ва ним соат бозпурсӣ карданд, ҳарчанд ман ба онҳо суроғаҳоям дар Алмаатову Душанбе, рақамҳову рамз (код)-и телефон ва визиткаамро дода, 100 бор фаҳмонидам, ки аз ҷашнвораи байнулмилалии театрӣ бармегардам. Ин барои онҳо лозим набуд: «Фармуданд, ки шумоёнро бе бозпурсӣ иҷоза надиҳем».
Акнун бигӯед, ки оё ман ба гунаҳкории касоне, ки дар вилояти Владимир куштаанд, бовар карда метавонам? Барои инҳо қулай аст, ки шахсони хомӯшро биёбанд, то ки муқовимат накунанд ва онҳо ёфтаанд. Шахсони хомӯш моем!
Иззат Амон:
– Масъалаи риояи ҳуқуқи муҳоҷирони корӣ бе ин ҳам нигаронкунанда буд, вале баъди амали террористӣ ва изҳороти Бортников аз ин ҳам хеле бадтар шуда, акнун муҳоҷиронро дар ҳар қадаме боздошт, тафтиш ва ихроҷ мекунанд. Изҳороти Бортников ихтиёри мақомоти интизомиро вусъат дода, ба онҳо имкон дод, ки бидуни масъулияте муҳоҷиронро шикору муҷозот кунанд.
Дар ин робита ман мисоли мушаххас дорам. Акбаршо Раҳимов, шаҳрванди Тоҷикистон ғайриқонунӣ аз ҷониби суд ихроҷ шуд, ҳарчанд тамоми ҳуҷҷатҳои будубошу кори қонуниро дошт. То аз ҷониби зинаи апеллятсионӣ бекор шудани ин қарори суд, ӯ чанд рӯзро дар қабулгоҳи махсус паси сар кард.
Қобили зикр аст, ки баъди амали террористӣ натанҳо тоҷикистониён, балки шаҳрвандони Ӯзбекистону Қирғизистон ҳам азият мекашанд. Чанде қабл мақомот шаҳрванди Ӯзбекистон Меҳриддин Нурмоновро ғайриқонунӣ аз шаҳрвандӣ маҳрум карда, сипас суд доир ба ихроҷи ӯ ҳалнома содир намуд.
