Баъди таъини вакил аз Ҳизби халқии демократии Тоҷикистон (ҲХДТ) Дилшод Исматуллоев ба мансаб дар сохтори давлатӣ дар палатаи поёнии парлумон шахси нав пайдо мешавад.
Мувофиқи меъёрҳои қонунгузорӣ, ваколатҳои вакил Дилшод Исматуллоев, ки санаи 8 май бо фармони президент Эмомалӣ Раҳмон муовини роҳбари Дастгоҳи иҷроия Сарвари давлат таъин шуд, қатъ карда мешаванд.
«Чун Исматуллоев моҳи марти соли 2015 аз ҳавзаи ягонаи умумиҷумҳуриявии интихоботӣ вакил интихоб шуд, бо қатъи ваколатҳо ҷояшро дар парлумон бидуни баргузории интихоботи нав номзади навбатӣ тибқи рӯйхати ҲХДТ ишғол мекунад ва ин номзад узви ҲХДТ, муовини вазири кишоварзии ҷумҳурӣ Ҷамила Саидова мебошад», – хабар дода ба «Азия-Плюс» як манбаъ аз ҲХДТ.
Дилшод Исматуллоев сеюмин вакили даъвати ҳозираи палатаи поёнии парлумон аз ҲХДТ аст, ки дар робиита ба таъинот ба мансаб дар сохтори давлатӣ курсии вакилиро тарк мекунад.
Қаблан ваколатҳои Пӯлод Муҳидддинён қатъ шуда буд: 13 октябри соли 2016 бо фармони президент ӯ директори Гурӯҳи амалисозии лоиҳаҳои сохтмони иншооти энергетикии назди Президенти ҶТ таъин шуд. Ваколатҳои ӯ ба Фирӯза Шарифӣ гузаштанд, ки ба ҳайси сардори Раёсати кор бо занони Кумитаи иҷрояи ҲХДТ фаъолият мекард.
Моҳи июни соли 2015 дар робита ба раиси Иттифоқи нависандагон интихоб шудан, курсии вакилиро Низом Қосим низ холӣ кард. Ҷои ӯро бидуни баргузории интихобот номзади навбатии ҲХДТ, Ҳунарманди халқӣ Миралӣ Достиев ишғол кард.
Ёдрас мекунем, ки дар интихоботи 1 марти соли 2015 аз ҳавзаи ягонаи умумиҷумҳуриявии интихоботӣ тибқи рӯйхати ҲХДТ – 16 нафар, Ҳизби аграрӣ – 3 нафар, Ҳизби ислоҳоти иқтисодӣ – 2 нафар ва Ҳизби сотсиалистии Тоҷикистон – 1 нафар вакилони палатаи поёнии парлумон интихоб шуданд.
