Субҳи имрӯз Президенти Тоҷикистон Эмомалӣ Раҳмон бо сафари корӣ ба ноҳияи Данғара раҳсипор гардид.
Бино ба иттилои хадамотиматбуоти сарвари давлат, Эмомалӣ Раҳмон нахуст дар деҳаи Сангтӯда бо буридани лентаи рамзӣ ба фаъолияти Муассисаи таҳсилоти миёнаи умумии № 9, боз як мактаби наву замонавӣ дар мамлакат, ки аз рӯи меъёрҳои байналмиллалӣ бунёд шудааст, расман оғоз бахшид.
Зимни суханронӣ дар маросими ифтитоҳи ин мактаб Сарвари давлат изҳор намуд, ки дар ин муассисаи нави таълимӣ барои таълиму тарбия ва рушди нерӯи зеҳниву ҷисмонии шогирдон утоқҳои муҷаҳҳази фаннӣ, китобхонаву маҷлисгоҳ ва толору майдони варзишӣ бо беҳтарин шароити замонавӣ фароҳам оварда шудаанд.
Дар ноҳияи Данғара Президенти Тоҷикистон ҳамчунин дар расми мавриди баҳрабардорӣ қарор додани бинои наву замонавии Муассисаи таҳсилоти миёнаи умумии № 8 иштирок карда, ҳамаи омӯзгорону шогирдон ва падару модаронро ба муносибати ифтитоҳи ин боргоҳи илму маърифат самимона табрик гуфт.
Эмомалӣ Раҳмон зимни суханронӣ дар ин маросим зикр кард, ки бо мақсади рушди бомароми соҳаи маориф якчанд барномаи давлатӣ қабул ва татбиқ карда шуда, аз ҷумла соли гузашта ҷиҳати ҳалли мушкилоту масъалаҳои ҷойдошта ва боз ҳам беҳтар намудани сатҳу сифати таълиму тарбия бо қарори Ҳукумати мамлакат Барномаи давлатии рушди муассисаҳои соҳаи маорифи вилояти Хатлон барои солҳои 2017-2021 қабул карда шуд.
Дар деҳоти ба номи Исмат Шарифови ноҳияи Сарвари давлат бо рафти татбиқи лоиҳаи «Обёрии заминҳои водии Данғара» марҳилаи дуюм шинос шуда, иттилоъ дода шуд, ки лоиҳаи «Обёрии заминҳои водии Данғара» марҳилаи ду солҳои 2008-2016 амалӣ гардида, лоиҳаи марҳилаи якум солҳои 2001-2006-ро дар бар мегирад ва ҷамъи заминҳои азхудкардашуда ва обёрӣ гардида дар ду марҳила зиёда аз 4200 гектарро ташкил медиҳад.
Зикр мегардад, ки марҳилаи 3-юми татбиқи лоиҳаи “Обёрии заминҳои водии Данғара”аллакай оғоз гардида дар соли 2017 маблағи 381,4 ҳазор доллари ИМА ва аз аввали марҳила бошад 2849,2 ҳазор доллари ИМА аз худ карда шудааст. Дар доираи татбиқи лоиҳаи марҳилаи сеюм азхуд намудани 1750 га заминҳои нав дар назар аст, ин имконияти таъсиси боз 8 ҳазор ҷойи нави кории иловагиро фароҳам меоварад.
