Додани асноди ронандагӣ, бақайдгирӣ ва гузаронидани муоинаи ҳатмии давлатии техникии воситаҳои нақлиёти механикӣ дар Тоҷикистон муваққатан манъ карда мешавад.
Раёсати БДА ВКД Тоҷикистон иттилоъ медиҳад, ки ин кор бо сабаби гузаронидани корҳои профилактикӣ дар Маркази иттилоотии ҷумҳуриявии БДА ВКД Тоҷикистон рӯзҳои 8 – 11 июли соли 2017 сурат мегирад.
Қобили зикр аст, ки аз баҳори соли 2014 Тоҷикистон ба додани шаҳодатномаҳои ронандагии биометрӣ гузашта, асноди намунаи нав дар қаламрави кишвар мувофиқи талаботи Конвенсияи Вена дар бораи ҳаракат дар роҳ, ки Тоҷикистон низ узваш мебошад, ҷорӣ шуд.
Санадҳои намунаи нав аз шаҳодатномаҳои маъмулӣ бо он фарқ мекунанд, ки сатҳи баланди ҳимоя дошта, андозаашон нисбатан хурдтар ва кортҳои хурди пластикӣ мебошанд.
Ҳамчунин мебояд гуфт, шурӯъ аз соли равон шаҳодатномаҳои ронандагии Тоҷикистон дар қаламрави Русия дигар эътироф намешаванд. Акнун онро бо тамоми расмиёташ, аз ҷумла омӯзиши иловагӣ дубора мебояд гирифт.
Дар ҳамин ҳол, дар муроҷиатномаи Думаи давлатии Русия ба президенти ин кишвар, ки санаи 5 июл ироа шуд, пешниҳод шуд, ба ҳуҷҷати ронандагии Қирғизистон мақоме дода шавад, ки ба шаҳодатномаи белорусӣ ҳамчун кишвари ҳампаймони Русия дода шудааст.
Агар пешниҳод қабул шавад, шаҳрвандони Қирғизистон дигар маҷбур нестанд, аз забони русӣ имтиҳон супоранд ва бо шаҳодатномаи миллии худ метавонанд, дар Русия ронандагӣ кунанд.
