Президенти Ӯзбекистон Шавкат Мирзиёев ҳунарнамоии овозхони шинохтаи тоҷик Ҷурабек муродовро махсус қайд кард. Ҷӯрабек Муродов дар консерт бахшида ба ҷашни 100-солагии Ҳунарманди халқии Ӯзбекистон Комилҷон Отаниёзов дар Ӯзбекистон иштирок кард.
Бино ба маълумоти ВАО, зимни суханронӣ назди зиёиёни кишвар рӯзи 3 август Шавкат Мирзиёев изҳор намуд, ки бо ҳаяҷону завқи беандоза ҳунарнамоии сарояндаи саршиноси тоҷик Ҷӯрабек Муродовро тамошо кардааст.
Қобили зикр аст, ки Ҷӯрабек Муродов, Ҳунарманди мардумии Иттиҳоди Шӯравӣ охири моҳи июл аз Ӯзбекистон боздид намуда, дар чорабиниҳои ҷашни 100-солагии Ҳунарманди мардумии Ӯзбекистон Комилҷон Отаниёзов иштирок ва дар консерти бахшида ба ин ҷашн якчанд сурудҳои худро ба иҷро расонид.
Дар мусоҳиба ба «Азия-Плюс» Ҷӯрабек Муродов изҳор дошт, ки ӯ натанҳо барои ҳозирин якчанд суруди худро пешкаш кардааст, балки тамошобинони суршуморро табрик ҳам кардааст.
«Дар суханрониам ман гуфтам, ки то аввали солҳои 90-уми асри гузашта бисёр халқҳо ба дӯстии тоҷикону ӯзбекон ҳасад мебурданд, иброз дошт ӯ. – То замони пошхӯрии Иттиҳоди Шӯравӣ мо як халқ будем. Имрӯз дӯстии мо, ки аз Абдураҳмони Ҷомӣ ва Алишери Навоӣ сарчашма мегирад, эҳё мешавад. Ҳеҷ касе ҳақ надорад, ки миёни ин дӯстӣ рахнае андозад».
Ба гуфтаи Муродов, аксари шоирону нависандагон ва ҳунармандони тоҷику ӯзбек барои мардуми ҳарду кишвар шеъру асар ва суруду таронаҳо эҷод мекарданд.
«Ман зикр кардам, ки бо сари мансаб омадани президенти нави Ӯзбекистон дар муносибатҳои ҳамсоякшварҳо дар ҳамаи соҳаҳо беҳбудии назаррас ба мушоҳида мерасад, ки аз ин ҳам дар Тошканду ҳам дар Душанбе ҳама хеле хурсанданд», – таъкид дошт овозхон.
Зимни сухаронӣ назди тамшобинони ӯзбек Ҷӯрабек Муродов таъкид доштааст, ки ҳанӯз ҳангоми таҳсил дар мактаби миёна бо эҷодиёти Комилҷон Отаниёзов шинос шудааст.
«Ман яке аз ҳазорон сарояндаҳои Осиёи Миёна мебошам, ки аз мактаби эҷодии Комилҷон Отаниёзов сабақ гирифтаам», – қайд кард Ҷӯрабек Муродов.
