Масъулони шабакаҳои барқи пойтахти Тоҷикистон аллакай муддати се рӯз пайдарпай интиқоли барқ ба маҳаллаи Зарафшонро қатъ мекунанд.
Тавре ба «Азия-Плюс» сокинони ин микрорайон хабар доданд, шурӯъ аз 12 сентябр то ҳол мунтазам интиқоли барқ қатъ мешавад.
«Давоми шабонарӯз бидуни огаҳӣ ин ҳолат то 10 маротиба такрор шуда, одамон аз 30 дақиқа то 1,5 соат бе барқ мемонанд. Дар натиҷа лифту дигар техникаи маишӣ аз кор мебароянд», – иброз доштанд онҳо.
Аз муроҷиати сершумори сокинони маҳалла ба ширкати «Барқи тоҷик» алҳол ҳеҷ натиҷае ҳосил нашудааст. «Айни замон тамоми маҳалла бебарқ буда, даҳҳо нафар дар лифтҳо дармондаанд», – афзуданд сокинони маҳалла.
То ҳол имкон даст намедиҳад, ки аз ширкати «Барқи тоҷик» дар мавриди ин масъала шарҳе дастрас бикунем.
