Дар ҷаласаи ситоди ҷумҳуриявӣ оид ба омодагии ноҳияҳои ВМКБ ба мавсими тирамоҳу зимистони имсола дар шаҳри Хоруғ муовини сарвазири Тоҷикистон Азим Иброҳим фаъолияти ситоди вилоятӣ ва ноҳияҳоро мавриди интиқод қарор дода, қайд кард, ки маълумоти омории онҳо аз ҳам тафовути зиёд доранд.
Зикр гардид, ки сарфи назар аз моҳи сентябр ҷудо шудани воситаҳои зарурӣ барои харидории ангишт, имрӯз дар ВМКБ аз нақшаи пешбинишуда дар муассисаҳои соҳаи маориф – 84%, тандурустӣ – 68% ва фарҳанг – 85% ангишт захира шудааст.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, муовини сарвазир аз фаъолияти кормандони идораҳои истифодаи роҳҳои вилоят низ интиқод карда, изҳор дошт, ки то имрӯз онҳо ҳамагӣ 21% аз нақшаи пешбинишуда сӯзишворӣ захира кардаанд.
Дар ҷаласа ҳамчунин қайд шуд, ки дар ВМКБ барои зимистонгузаронии чорво ба таври кофӣ ему хошок захира нагардида, дар ин робита муовини сарвазир дастур дод, ки то 15 октябр ин масъала ҳаллу фасл шавад.
Муовини сарвазир аз сатҳи рушди саноат дар ноҳияи Дарвоз қаноатмандӣ изҳор намуда, ба раисони ноҳияҳои Мурғобу Ишкошим дастур дод, ки ҷиҳати рушди ин бахши иқтисод тадбирҳои муассир рӯйи кор гиранд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
