Зимни вохӯрии сардори Хадамоти гумруки назди ҳукумати Тоҷикистон Абдуфаттоҳи Ғоиб бо роҳбари Хадамоти федералии гумруки Русия Владимир Булавин дар Душанбе вазъи кунунӣ ва дурнамои муносибатҳои дуҷонибаи кишварҳо баррасӣ шуд.
Бино ба иттилои дафтари матбуоти Хадамоти гумруки ҷумҳурӣ, дар ҷараёни мулоқот ҷонибҳо натиҷаҳои фаъолияти муштарак дар самти таъсиси роҳу воситаҳои табодули маълумоти омориро оид ба тиҷорати мутақобила дар шакли электронӣ мавриди таҳлилу баррасӣ қарор дода, доир ба эътирофи натиҷаҳои назорати гумрукӣ нисбати навъҳои муайяни маҳсулот санади дахлдор ба имзо расид.
Гуфта мешавад, бо дарки зарурати табодули маълумот тариқи механизми электронӣ ҷонибҳо дар мавриди суръат бахшидан ба анҷоми расмиёти гумрукӣ ва ташкили вохӯриҳои дуҷониба ба мувофиқа расиданд.
Зимнан зикр мегардад, ки дар вохӯрӣ ҳамчунин ба масоили мувофиқасозии санадҳои дуҷониба, табодули таҷриба дар соҳаи фаъолияти гурӯҳҳои задамал, тақдими воситаҳои нақлиёти автомбилӣ ба Хадамоти гумруки Тоҷикистон дар доираи кумаки техникӣ, ифтитоҳи намояндагии Хадамоти федералии гумруки Русия дар Тоҷикистон низ таваҷҷуҳ зоҳир намуданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
