Фурӯшандагони бозори Шоҳмансур (Зелёний), ки санаи 9 октябр барҳам дода шуд, дар бозори нави «Меҳргон» ҷойҳои худро ишғол намуданд.
Сарфи назар аз ҷойгир шудани бозор дар мавзеи канораву дурдасти шаҳр, нақлиёти ҷамъиятии ба он ҷо равуокунанда кофист: маршруткаҳои №1, 25, 2, 67 ва 18.
Қобили зикр аст, ки моҳи сентябри соли 2014 дар шаҳри Душанбе маҷмааи савдои «Пойтахт-90» (ба «Меҳргон» табдили ном кард) ба истифода дода шуд. Барои сохтмони он аз буҷети пойтахт 202,6 млн. сомонӣ (ҳудуди 40 млн. доллар) маблағ ҷудо шуда, вале то ин вақт он қариб холӣ буд.
Аз моҳи апрели соли равон ҶДММ «Маркази савдои «Истиқлол» ин бозороо ба иҷора гирифта, аз нимаи ҳафтаи гузашта баъди барҳам додани бозори «Шоҳмансур», фурӯшандагони он ба ин ҷо кӯчиданд ва бозор каме серодаму савдо низ нисбатан ривоҷ меёбад.
Айни замон дар ошёнаи якум – рафҳои сабзавоту мева ва хӯришҳову нон, ҳамчунин рафҳои фурӯши маҳсулоти гӯшту ширӣ, дар ошёнаи дуюм – фурӯшгоҳҳои хушкмева, қанду асал ва шириниҳо, дар ошёнаи сеюм мағозаҳои фурӯши сарулибоси кӯдакона ва нуқтаҳои хӯроки умумӣ ҷойгир шудааст.
Дар гирду атрофи бозор низ бо халтаҳо сабзавоту мева ва дигар маҳсулот фурӯхта мешавад. Фурӯшандагони ин ҷо дар самти шимоли бозор анҷоми корҳои сохтмони бозори пӯшидаи савдои яклухти маҳсулоти кишоварзиро интизоранд.
Тоҷирони ба ин ҷо кӯчида аз маҳалли ҷойгиршавии бозор, ки бо ин сабаб харидорон каманд, ҳаҷми маблағи иҷора, ки се моҳи аввал намегиранду ба назарашон аз бозори Шоҳмансур зиёдтар мешавад, каме нороҳатанд, вале ба оянда бо назари нек менигаранд.
Дар даромадгоҳи бозор аробаҳо гузошта шуда, кашонидани сумкаҳои вазнин лозим намеояд. Нисфи фурӯшандагон низ аллакай сарулибоси махсуси маркази савдои «Меҳргон»-ро дар бар доранд, ки бояд ба 70 сомонӣ харанд.
Нархҳо начандон аз нархҳои бозори «Шоҳмансур» фарқ доранд: картошка – 3, сабзӣ – 2,5, пиёз – 1,5, себу нок – 8-10, биринҷ – 10-12 ва помидору бодиринг – 5-8 сомонӣ нарх доранд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
