Ширкати алюминии тоҷик (ТАЛКО) соли гузашта 16,5 фоиз аз ҳаҷми умумии нерӯи барқи истеҳсолшударо дар воҳидҳои зертобеъи «Барқи тоҷик» истифода кардааст.
«ТАЛКО соли гузашта 2 млрд. 533,3 млн. кВт/соат нерӯи барқ гирифт, ки нисбат ба нишондиҳандаи соли 2016 – 412,2 млн. кВт/соат камтар аст», – хабар дод раиси ширкати «Барқи тоҷик» Мирзо Исмоилзода зимни нишасти хабарӣ.
Соли 2016 корхонаи алюминии Тоҷикистон 2 млрд. 945,5 млн. кВт/соат нерӯи барқ истифода карда буд.
Ӯ қайд кард, ки соли 2017 ҳаҷми умумии нерӯи барқи истеҳсолшуда аз ҷониби воҳидҳои зертобеъи ширкати «Барқи тоҷик» 15 млрд. 359,1 млн. кВт/соатро ташкил медиҳад, ки дар муқоиса бо соли 2016 – 955,8 млн. кВт/соат зиёдтар мебошад.
Ҳамин тариқ, аз ҳаҷми умумии нерӯи истеҳсолкардаи корхонаҳои «Барқи тоҷик» ТАЛКО соли 2017 – 16,5 фоиз ва соли 2016 – 20,4 фоизашро истифода кардааст.
Тарифи нерӯи барқ барои ТАЛКО аз 1 май то 30 сентябр 7,20 дирам барои 1 квт/соат ва мавсими зимистон (аз1 октябр то 30 апрел) – 11,80 дирамро ташкил медиҳад. Барои аҳолӣ айни замон 1 кВт/соат нерӯи барқ 16,85 дирам арзиш дорад.
Дар ҳамин ҳол, тибқи маълумоти ширкати «Барқи тоҷик», соли гузашта арзиши аслии 1 кВт/соат нерӯи барқ 17,8 дирам ва тарифи миёна – 15,9 дирамро ташкил додааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
