Вазири корҳои хориҷии Тоҷикистон Сироҷиддин Аслов насаби шакли русиашро ба тоҷикӣ иваз намуд.
Ивази насабро ӯ ҳанӯз соли гузашта оғоз намуда, аммо бо сабаби серкориву иштирок дар чорабиниҳои байнулмилалӣ ҳам дар дохил ва ҳам дар хориҷи кишвар, танҳо акнун муяссар шудааст, ки насабашро ба Муҳриддин иваз намояд, хабар доданд ба «Азия-Плюс» аз Вазорати корҳои хориҷии ҷумҳурӣ.
Дар маълумоти интишоршуда дар сомонаи Вазорат доир ба вохӯрии вазир бо намояндагони Ташкилоти ҷамъиятии ҷавонони “Созандагони Ватан” бахшида ба Рӯзи ҷавонон номи ӯ Сироҷиддин Муҳриддин зикр шудааст.
Гуфта мешавад, дар ин вохӯрӣ вазир ҷавононро табрик намуда, аз ҷумла қайд намуд, ки сиёсати хориҷӣ аз ҷониби Президенти Тоҷикистон Эмомалӣ Раҳмон муайян гардида, тариқи Вазорати қорҳои хориҷӣ амалӣ мегардад.
Тамоили ивази ному насаб аз русӣ ба тоҷикӣ пас аз ному насабашро аз Эмомалӣ Раҳмонов ба Эмомалӣ Раҳмон иваз намудани сарвари давлат дар соли 2007 бештар фаъолтару густарда гардида, аксари шаҳрвандони Тоҷикистон ба ӯ пайравӣ карданд. Аммо баъди чанде онҳо аз Русия ба ватан баргашта, боз ному насаби пешинаи шакли русии худро барқарор кардан гирифтанд.
Моҳи январи соли 2014 он замон прокурори генералии Тоҷикистон Шерхон Салимзода изҳор кард, ки солҳои охир даст кашидан аз тарзҳои миллии номгузорӣ зиёд ба мушоҳида расида, шахсони мансабдори мақомоти давлатӣ ба ин мусоидат менамоянд. Баъди ин изҳорот мавҷи навбатии ивази ному насаб дар Тоҷикистон рӯйи кор омад.
Пас аз изҳороти прокурори генералӣ, раиси Кумитаи забон ва истилоҳоти назди ҳукумати ҶТ Гавҳар Шарофзода дар мавриди ин масъала изҳор намуд, ки даст кашидан аз пасвандҳои русӣ дар ному насаб «қарзи миллии ҳар як шаҳрванди Тоҷикистон» аст. Пас аз ин аксари мансабдорони воломақоми давлатӣ ному насабҳои худро ба шакли тоҷикӣ иваз карданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
