Дар 11–умин намоишгоҳ ва Форуми занҳои ихтироъкори ҷаҳон, ки дар шаҳри Сеули Кореяи Ҷанубӣ баргузор гашт, 9 адад ихтироъи бонувон-ихтироъкорони Тоҷикистон ба медалҳои, тилло (4 адад), нуқра (4 адад) ва биринҷӣ (1 адад) қадрдонӣ карда шуданд.
Ин бонувонро барои иштирок дар ин чорабинӣ Муассисаи давлатии Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон интихоб намуд.
Аз Маркази мазкур иттилоъ доданд, ки аз ҷумла, Тағоева Сураё, номзади илмҳои кимиё, дотсент, мудири Кафедраи “Пайвастҳои калонмолекулӣ ва технологияи химияви”-и Факултети кимиёи Донишгоҳи миллии Тоҷикистон барои ихтироъ дар соҳаи кимиё бо номи “Эфири этилии 2- атсетил – 4- ҳидрокси – 5 – бутилокси кислотаи пентан ҳамчун маводи хушбӯй”, Ҳалимова Фариза номзади илмҳои техникӣ, дотсенти Кафедраи “Физиологияи муқаррарӣ”-и Донишгоҳи давлатии тибии Тоҷикистон ба номи Абӯалӣ ибни Сино, барои ихтироъ дар соҳаи тиб бо номи “Тарзи пешгӯии вайроншавии саломатии репродуктивӣ”, Ғайбуллоева Зумрат номзади илмҳои кимиё, устоди Донишгоҳи техникии Тоҷикистон ба номи М.С.Осимӣ барои ихтироъ дар соҳаи металургия бо номи “Тарзи истихроҷи сурб аз консентратҳои полиметаллии сулфидӣ”, Мижгона Шуҳратзода ассистент, аспиранти кафедраи “Кимиёи фармасевтӣ ва токсикология”-и Донишгоҳи давлатии тибии Тоҷикистон ба номи Абӯалӣ ибни Сино, барои ихтироъ дар соҳаи тиб бо номи “Метрарги фаъолияти зиддимикробӣ зоҳиркунанда” ба гирифтани медалҳои тилло шарафёб гардиданд.
Гуфта мешавад, Қаҳорова Раъно, номзади илмҳои тиб, корманди Маркази колопроктологияи шаҳри Душанбе барои ихтироъ дар соҳаи тиб бо номи “Малҳами бензой барои табобати раванди илтиҳоби фасодӣ”, Султонмамадова Маина, номзади илмҳои кимиё, устоди кафедраи Кимиёи органикии Донишгоҳи миллии Тоҷикистон барои ихтироъ дар соҳаи кимиё бо номи «Эфири 1,2-пропан-диоли туршобаи 3α,7β- дигидрокси холонат ба сифати маводи холелитолитикӣ ва гипохолестиеринӣ», Расулова Замира лаборант –духтури клиникии Институти гастроэнтерологияи Академияи илмҳои Ҷумҳурии Тоҷикистон барои ихтироъ дар соҳаи тиб бо номи “Маводи «Фитазид» дорои таъсири зиддимикробӣ”, Муродова Шабнам –духтури ҷарроҳ, аспиранти Донишгоҳи давлатии тибии Тоҷикистон ба номи Абӯалӣ ибни Сино барои ихтироъ дар соҳаи тиб бо номи “Тарзи ташхиси лапароскопии дараҷаи долихосигма” соҳиби медалҳои нуқра шуданд.
Мабадқадамова Кимиё номзади илмҳои кимиё., дотсент, ходими пешбари илмии Пажуҳишгоҳи илмӣ-таҳқиқотии Донишгоҳи миллии Тоҷикистон барои ихтироъ дар соҳаи кимиё бо номи “Тарзи сайқалдиҳии электролитии маснуоти тиллогӣ” ба медали биринҷӣ сазовор дониста шуд.
«Ин соли ҳафтум аст, ки ихтироъҳои бонувони тоҷик дар намоишгоҳ ва Форуми занҳои ихтироъкори ҷаҳон, ки дар шаҳри Сеули Кореяи Ҷанубӣ баргузор мегардад дар сатҳи байналмилалӣ қадрдонӣ карда мешаванд», – омадааст дар хабари Марказ.
Зимнан зикр мегардад, ки дар маҷмуъ 21 нафар бонувон-ихтироъкорони тоҷик бо пешниҳоди 35 адад ихтироъҳои худ, (дар давраи солҳои 2012-2018), дар намоишгоҳи байналмилалии «Занҳои ихтироъкори ҷаҳон», сазовори 34 адад медалҳои тилло, нуқра ва биринҷӣ гардидаанд.
Ба иттилои манбаъ, барои методи эҷодӣ ва хуби пешгӯии тарзи пешгӯии вайроншавии саломатии репродуктивӣ ДДТТ ба номи Абӯалӣ ибни Сино ба мукофоти махсус – Шоҳҷоизаи озмуни KIWA, медали тилло, мукофоти махсуси Ассотсиатсияи ихтироъкорони Олмон ва сертификат аз Ассостсиатсияи ихтироъкорони Таиланд қадрдонӣ карда шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
