Муовини аввали вазири нақлиёти Тоҷикистон Суҳроб Мирзоев зимни нишасти хабарии имрӯза изҳор намуд, ки барои анҷоми пурра сохтмони нақби «Истиқлол», ки қисмати марказии ҷумҳуриро ба шимол пайваст мекунад, боз беш аз 8 млн. доллар маблағ зарур аст.
Ба савол дар бораи кай дар ниҳояти кор комидан ба итмом расидани сохтмони нақб ва ба таври бояду шояд кор накардани низоми равшанидиҳиву ҳавософкунӣ дар он муовини вазири нақлиёти кишвар чунин посух дод.
Вазири нақлиёти ҷумҳурӣ қайд кард, ки худаш шахсан субҳи рӯзи 17 июл тариқи ин нақб гузашта, низоми равшанидиҳанда дар он кор мекунад.
Муовини вазир дар навбати худ зикр кард, ки «дарвоқеъ айни замон корҳои васлу насби низоми ҳавософкунӣ ва дастгоҳҳои оташхомӯшкуниро ба итмом расонидан лозим аст».
«Лоиҳаи корҳои зарурӣ омода буда, лекин барои анҷоми он боз 8 млн. 200 ҳазор доллар маблағ лозим аст. Ин масъаларо мебояд бо ҷониби Эрон мувпофиқа кард. Айни замон ин масъала бо Вазорати энергетикаи Эрон барасӣ мешавад. Лекин низоми равшанидиҳандаи муваққатӣ он ҷо кор мекунад», – изҳор дошт Суҳроб Мирзоев.
Соли 2003 Тоҷикистону Эрон дар бораи идомаи сохтмони нақби «Истиқлол» созишнома ба имзо расонида, ҳаҷми маблағгузорӣ 39 млн. доллари ИМА-ро ташкил дод. Аз ин миқдор 10 млн. $ маблағгузории бурсии ҳукумати Эрон, 7,8 млн. $ – ҳиссаи ҳукумати Тоҷикистон ва 21,2 млн. $ – қарзи ҷониби Эрон буд. Ҳарчанд маросими ба истифода додани он ҳанӯз соли 2006 доир гардида бошад ҳам, корҳои иловагии сохтмону бозсозии он то ҳанӯз идома дорад.
Моҳи апрели соли гузашта ширкати эронии «Собир» корҳои бозсозии нақби «Истиқлол»-ро дубора барқарор кард.
Қаблан ҳукуматҳои Тоҷикистону Эрон ба мувофиқа расида буданд, ки барои комилан ба анҷом расидани сохтмони нақб дар ҳаҷми 6 млн. $ иловатан маблағгузорӣ мекунанд. Ҷонибҳо уҳдадор шуда буданд, ки барои иҷрои корҳои боқимонда дар нақб ҳар кадоме 3 млн. $ маблағ ҷудо мекунанд.
Нақби «Истиқлол» дар 90 километрии шимоли Душанбе, дар роҳи мошингарди Душанбе – Хуҷанд воқеъ буда, аз зери ағбаи баландкӯҳи Анзоб мегузарад. Масофаи нақби «Истиқлол» 5,2 километрро ташкил медиҳад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
