Президенти Тоҷикистон Эмомалӣ Раҳмон санаи 30 июл дар бораи аз вазифаи раиси суди ноҳияи Айнии вилояти Суғд озод кардани Икром Ҷумазода барои “содир намудани кирдоре, ки шаъну эътибори судяро паст мезанад”, фармон ба имзо расонид.
“Икром Ҷумазода моҳи августи соли 2014 ба вазифаи раиси суди ноҳияи Айнӣ таъин шуда, нимаи моҳи июли соли равон аз ҷониби кормандони Агентии зиддифасод ҳангоми гирифтани пора дар ҳаҷми 16 ҳазор доллар дастгир шуд”, – хабар дод ба “Азия-Плюс” як манбаъ аз мақомоти судии Тоҷикистон.
Бино ба иттилои хадамоти матбуоти Сарвари давлат, бо фармони дигари Президент Рафиқҷон Олимзода, ки то ин дам ба ҳайси раиси суди ноҳияи Мастчоҳ кор мекард, судяи суди шаҳри Хуҷанди вилояти Суғд таъин гардид.
Файзалӣ Идизода аз вазифаи Директори Маркази миллии қонунгузории назди Президенти Тоҷикистон озод ва бо қарори ҳукумат Ректори Донишкадаи омӯзгории Тоҷикистон дар ноҳияи Рашт таъин карда шуд.
Муродалӣ Маҳмадализода, ки то ин замон вазифаи ректорро дар ин донишкада ба дӯш дошт, бо сабаби ба кори дигар гузаштанаш аз ин вазифа сабукдӯш шуд.
Масъалаи тағйироти кадрӣ дар сохторҳои ҳукумат зимни маҷлиси навбатии ҳукумат рӯзи 30 июл баррасӣ шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
