Вазири корҳои дохилӣ генерал-полковники милитсия Раҳимзода Рамазон Ҳамро ва Раиси Кумитаи давлатии амнияти миллӣ генерал-полковник Саймумин Ятимов ба ғолибони озмуни «Фаъолияти оперативӣ-ҷустуҷӯӣ» байни кормандони ин ниҳодҳо туҳфа ва мукофотпулиҳо тақдим карданд.
Бино ба иттилои маркази матбуоти ВКД Тоҷикистон, дар ин озмун 20 нафар кормандони самти фаъолияти оперативӣ аз ВКД ва КДАМ иштирок намудаанд.
Гуфта мешавад, ба ғолибони ҷойи аввал – корманди қатории КДАМ Наргис Раҷабова ва капитани милитсия Авазҷон Саидов ба маблағи 5 ҳазор сомонӣ ва ғолибони ҷойи дуюм – корманди КДАМ прапоршик Беҳрӯз Воситов ва корманди ВКД капитани милитсия Анушервон Зоидзода ба маблағи 4 ҳазор сомонӣ мукофотпулӣ тақдим шуд.
Гуфта мешавад, ба соҳибони мақоми сеюм прапоршик Умаралии Файзалӣ аз КДАМ ва лейтенанти калони милитсия Довуд Сиҷоев аз ВКД 3 ҳазор сомонигӣ тақдим гардида, ҳамчунин, ба ду нафар парапоршик Турабой Давлатзода аз КДАМ ва лейтенанти милитсия Юсуф Шерализода нишони сарисинагии Вазорати корҳои дохилии Тоҷикистон «Корманди беҳтарини оперативӣ» супорида шуданд.
Дигар иштирокчиёни фаъол барои хизматҳои софдилона, содиқона зоҳир намудани дониши баланди назариявӣ-амалӣ дар самти фаъолияти оперативӣ-ҷустуҷӯӣ, васеъ намудани ҷаҳонбинӣ, саҳми арзанда дар баргузории чорабинӣ, инчунин ишғол намудани ҷойҳои намоён дар озмуни самти «Фаъолияти оперативӣ ҷустуҷӯӣ» бо Ифтихорнома ва Сипосномаҳо сарфароз гардиданд.
Рамазон Раҳимзода зимни суханрониаш таъкид дошт, ки яке аз самтҳои хизматии мақомоти ҳифзи ҳуқуқ фаъолияти оперативӣ-ҷустуҷӯӣ ба ҳисоб рафта, аз ин рӯ, гузаронидани чунин чорабиниҳо ба баланд бардоштани малакаи касбӣ ва ҳамкорӣ дар ҷодаи иҷрои вазифаҳои бадӯшдоштаи ҳамаи сохторҳои ҳифзи ҳуқуқ мусоидат менамояд.
Раиси КДАМ Саймумин Ятимов иброз дошт, ки натиҷаи ин сабқат, пеш аз ҳама, мустаҳкам намудани дӯстию бародарӣ миёни ҳамдигар баҳри таъмини тартиботи ҷамъиятӣ ва ободии кишвар мебошад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
