Собиқ сардори маркази матбуоти Сарраёсати Қушӯнҳои сарҳадии КДАМ Тоҷикистон Муҳаммадҷон Улуғхоҷаев ба 15 соли зиндон маҳкум шуд. Дар ин бора ба “Азия-Плюс” як манбаъ аз Суди олии Тоҷикистон хабар дод.
Санаи 14 август Ҳайати мушовара (коллегия)-и ҳарбии Суди олӣ ӯро дар “хиёнат ба давлат” (моддаи 305 КҶ ҶТ)” гунаҳкор эътироф намуд.
“Парвандаи ҷиноятӣ нисбати Муҳаммадҷон Улуғхоҷаев таҳти муҳри махфӣ баррасӣ шуд. Аз ин рӯ, ҳеҷ кас дар бораи ҷузъиёти он маълумот дода наметавонад. Айбдоркунандаи давлатӣ 20 соли маҳрумият аз озодиро талаб кард, лекин ҳайати мушовара ӯро ба 15 соли зиндон маҳкум намуд”, – гуфт манбаъ дар Суди олӣ.
Ёдрас мекунем, ки рӯзи 29 июл ҳайати мушовараи ҳарбии Суди олии Тоҷикистон ба баррасии парванда нисбати собиқ сардори маркази матбуоти Сарраёсати Қушӯнҳои сарҳадии КДАМ Тоҷикистон Муҳаммадҷон Улуғхоҷаев оғоз намуд.
“Ӯ мутобиқи моддаи 305 Кодекси ҷиноятии Тоҷикистон (Хиёнат ба давлат) айбдор карда мешавад. Бинобар ин мурофиа пушти дарҳои пӯшида сурат гирифта, ҳеҷ касеро ба он роҳ намедиҳанд. Адвокат ҳам ба ифшои ҷузъиёти парванда ҳуқуқ надорад”, – хабар дода буд он замон як манбаъ дар Суди олӣ.
Охири моҳи апрел маълум шуд, ки сардори маркази матбуоти Сарраёсати Қушӯнҳои сарҳадии КДАМ Тоҷикистон подполковник Муҳаммадҷон Улуғхоҷаев ба гумони ифшои сирри давлатӣ ба ҳабс гирифта шудааст.
Манбаи “Азия-Плюс” дар мақомоти ҳифзи ҳуқуқи Тоҷикистон дар ин робита хабар дода буд, ки ӯро кормандони КДАМ боздошт намудаанд.
“Ӯ гӯё маълумоти махфиро тариқи почта ё мессенҷер ирсол карда будааст. То ҷое, ки ман огаҳӣ дорам, санҷиши мундариҷаи мукотиба ва ҳамчунин варақаҳои иттилоотие, ки ӯ ба хабарузориҳо мефиристод, идома дорад. Аз маҳз кадом маълумоту онро ба кӣ фиристоданаш ман хабар надорам”, – гуфта буд манбаъ.
Пас аз боздошти Муҳаммад Улуғхоҷаев раиси КДАМ Саймумин Ятимов ба ҳамаи вазорату идора ва муассисаҳои давлатӣ мактуб фиристода, дар он огоҳ кардааст, ки “минбаъд котибони матбуотӣ дигар бе иҷозаи раҳбарияти худ ба ифшои маълумот ва додани онҳо ба журналистон ҳуқуқ надоранд”.
Дар яке аз хадамоти матбуоти мақомоти ҳифзи ҳуқуқ ба “Азия-Плюс” гирифтани чунин мактубро аз КДАМ тасдиқ намуда, дар дутои дигар хадамоти матбуотӣ иттилоъ дода буданд, ки “онҳо бе ин ҳам пешниҳоди маълумотро мунтазам бо раҳбарияташон мувофиқа мекунанд”.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
