Раиси Кумитаи кор бо занон ва оилаи назди Ҳукумати ҶТ Идигул Қосимзода ба маъракаи “60 рӯзи меҳнати зардбор дар пахтазор” пайваст.
Номбурда, ки намояндаи Ҳукумати мамлакат дар ноҳияи Қушониён вобаста ба тадбиқи нақшаи чорабиниҳои бахшида ба 30-солагии Истиқлолияти давлатӣ мебошад, саҳми худро дар ин маърака гузоштааст.
Дар ин бора Шуъбаи иттилоотию таҳлилии дастгоҳи раиси вилояти Хатлон хабар додааст.
Қобили зикр аст, ки бо ибтикори раиси вилояти Хатлон Қурбон Ҳакимзода то рӯзи 16-уми ноябр дар доираи иқдоми “60 рӯзи меҳнати зарбдор дар пахтазор” даври навбатии мусобиқаи оид ба ҷамъоварии ҳосили пахта идома дорад. Ҳар ним моҳ ба се шаҳру ноҳияе, ки нишондиҳандаи баландро соҳиб мешаванд, мукофоти пулӣ дар ҳаҷми 15 ҳазор, 10 ҳазор ва 5 ҳазор сомонӣ тақдим хоҳад шуд.
Дар 19 шаҳру ноҳияи вилояти Хатлон хоҷагиҳои пахтакор мавҷуд буда, кишоварзон дар ин мавсим ният доранд, беш аз 275 ҳазор тонна ҳосил ғундоранд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
