“Рекламаи минбаъдаи нӯшокиҳои газдор, аз ҷумла, Coca-Cola дар телевизион пас аз пешниҳоди сертфикати сифат имконпазир аст”, – гуфта мешавад дар посухи расмии раиси Кумитаи телевизион ва радиои Тоҷикистон Маҳмадсаид Шоҳиён ба агентии рекламавии Total Advertising Group (TAG), ки ба ҷойгиркунии рекламаи Coca-Cola дар шабакаҳои телевизиони Тоҷикистон машғул аст.
Ёдрас мекунем, ки аллакай ду ҳафта инҷониб дар шабакаҳои телевизиони маҳаллӣ навори рекламаи нӯшокиҳои газдор, аз ҷумла, Coca-Cola намоиш дода намешавад.
Кумита қайд мекунад, ки манъи рекламаи нӯшокиҳои газдор бо мақсади иҷрои талаботи қонун “Дар бораи реклама” амалӣ мешавад, ки дар он гуфта шудааст, рекламаи танҳо маҳсулоти дорои сертификати сифат иҷозат аст. Ҳамчунин қабули “Барномаи пешгирии фарбеҳӣ ва ташаккули ғизои солим дар Ҷумҳурии Тоҷикистон барои солҳои 2019-2024” ба манъи чунин реклама боис шудааст.
“Дар доираи тадбирҳои Барномаи мазкур Кумита ба дархости сертификати сифат аз ҳамаи маҳсулоти рекламашаванда уҳдадор аст. Дар ин робита, Кумитаи телевизиону радио намоиши рекламаи як қатор маҳсулотро, ки сертификати сифат надоранд, аз пахш гирифт”, – омадааст дар нома.
Зикр мешавад, ки дар сурати аз ҷониби TAG пешниҳод шудани ҳуҷҷатҳои зарурии сифат, намоиши наворҳои рекламавии Coca-Cola барқарор шуда метавонад.
Намояндаи TAG дар суҳбат бо хабарнигори “Азия-Плюс” хабар дод, ки сертификати сифат аз Coca-Cola-ро ширкат ба ҳамаи шабакаҳои телевизион моҳи марти соли равон пешниҳод карда буд.
“Аслан, пеш аз ҳар як мавриди ҷойгиркунии реклама дар телевизион мо сетификати сифатро пешниҳод мекунем. Ҳозир низ маълумотро навсозӣ карда, ба Кумита пешниҳод хоҳем кард”, – гуфт ӯ.
Қобили зикр аст, ки намоиши навори таблиғии «Coca-Cola» ҳатто дар барномаҳое, ки ин ширкат онҳоро маблағгузорӣ мекунад, боздошта шудааст. Дар ҳамин ҳол, худи рекламадиҳандагон аз талаботи Кумита огаҳӣ надоштанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
