Дастаи низоми дифои мушакии С-300-и Ҳавзаи марказии ҳарбии Русия аз 1-уми декабр ба навбатдории ҷангии озмоишӣ оғоз мекунад.
Тавре дафтари матбуоти Ҳавзаи марказии ҳарбии Русия хабар медиҳад, дар ин бора фармондеҳи нерӯҳои Ҳавза генерал-полковник Александр Лапин иттилоъ додааст.
“Дивизиони мушакии дифои ҳавоӣ, ки бо низомҳои С-300ПС мусаллаҳ аст, аз 1-уми декабр ба навбатдории ҷангии озмоишӣ шурӯъ мекунад. Айни замон корҳои омода кардани мавқеи ҷойгиркунии техника ҷараён дорад, ки то охири моҳи ноябр бояд ба анҷом расонида шаванд”, – шарҳ додааст Лапин.
Моҳи октябр пойгоҳи низомии 201-уми Русия бо низомҳои мушакии дифои ҳавоии С-300ПС мусаллаҳ шуд. Техника ба қаламрави кишвар тариқи роҳи оҳан интиқол дода шуд.
Вазифаи асосии дивизион таъмини ҳимояи иншооти пойгоҳи низомии 201-уми Русия аз воситаҳои ҳамла аз фазо ва кайҳон, ҳамчунин дифои зиддиҳавоии амнияти дастаҷамъии минтақаи Осиёи Марказӣ мебошад.
Ҳайати дивизион фарогири қариб 30 адад техника, аз ҷумла, нуқтаи фармондеҳӣ, дастгоҳҳои партоби мушак, муайян кардан ва пайгирии ҳадаф, ҳамчунин мошинҳои таъмини фаъолияти низом аст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
