Ҷангиёни созмони террористии ба ном Давлати исломӣ (ДОИШ), ки фаъолияташ дар Тоҷикистон манъ аст, барои омодагӣ ҷиҳати вуруд ба минтақаи Осиёи Марказӣ (ОМ) мавқеъашонро дар шимоли Афғонистон мустаҳкам карданиянд.
Тавре хабаргузории Интерфакс иттилоъ медиҳад, дар ин хусус котиби Шӯрои амнияти Русия Николай Патрушев дар Теҳрон зимни вохӯрии котибони Шӯрои амният ва мушовирон оид ба амнияти миллӣ дар Афғонистон изҳори назар кардааст.
“ДОИШ баҳри таҳкими ҳузури худ дар шимоли Афғонистон, ки аллакай беш аз 2 ҳазор ҷангиён ҷамъ омадаанд, инчунин муқовимат ба Толибон ва омодагӣ ҷиҳати вуруд ба минтақаи Осиёи Марказӣ тариқи Тоҷикистону Туркманистон кӯшиши зиёд ба харҷ медиҳад”, – иброз доштааст Патрушев.
Ӯ қайд кардааст, ки бо вуҷуди чанде пеш баргузор шудани амалиёти нерӯҳои ҳукумат, ки дар ҷараёни он нобуд кардан ё ба асорат гирифтани зиёда аз 600 нафар ҷангиён муяссар шудааст, тибқи маълумоти гуногун, то ҳол 2,5-3 ҳазор нафар аъзои ДОИШ дар Афғонистон боқӣ мондаанд.
Патрушев изҳор доштааст, ки ҳадафи ҷангиёни ДОИШ таъсиси ба истилоҳ давлати Хуросони Бузург аст, ки он қаламрави Афғонистон ва кишварҳои Осиёи Марказиро дар бар мегирад.
“Мувофиқи маълумоти мавҷуда, иншооти зерсохтор, биноҳои мақомоти қудратӣ ва намояндагиҳои дипломатӣ, ҳамчунин шаҳрвандони хориҷӣ аз ҷумлаи ҳадафҳои афзалиятноки ҷангиёни ДОИШ буда метавонанд”, – гуфтааст ӯ.
Хабаргузории РИА Новости менависад, такягоҳи ДОИШ дар шарқи Афғонистон воқеъ буда, он ҷо беш аз 1,5 ҳазор нафар ҷиҳодиён ҳузур доранд ва ба ин созмон пайвастани ҷангиёни нав аз Сурия ва Ироқ, ки тариқи Покистон меоянд, идома дорад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
