Дар шаҳри Теҳрон, пойтахти Эрон эътирозҳои зиддиҳукуматӣ дубора оғоз шуда, тазоҳургарон асосан ба ҷавобгарӣ кашидани онҳоеро талаб доранд, ки дар суқути ҳавопаймои "Боинг"-и украинӣ айбдор мешаванд.
Бино ба иттилои Бахши хабарии Осиёи Марказӣ, шоҳидон гуфтаанд, бештари тазоҳургарон донишҷӯён ҳастанд, ки шуморашон наздик ба ҳазор нафар аст. Эътирозҳои пешинро кормандони пулиси Эрон пароканда карда буданд.
Эътирозҳо дар Эрон зидди раҳбарияти олии ин кишвар рӯзи шанбе пас аз он дубора оғоз шуданд, ки фармондеҳии Сипоҳи посдорони инқилоби исломӣ иштибоҳан сарнагун сохтани ҳавопаймои украиниро эътироф кард. Ҳамаи 176 мусофир ва узви экипажи ҳавопаймо, ки аз Теҳрон ба Киев парвоз мекард, ҷон бохтанд. Мақомоти Эрон дар аввал мегуфтанд, ки ҳавопаймо дар натиҷаи оташ гирифтани муҳаррик суқут кард.
Хабаргузории нимарасмии Форс навиштааст, ки баъзе аз тазоҳургарон аксҳои Қосим Сулаймонӣ, фармондеҳи собиқи воҳиди Қудс дар Сипоҳи Посдорони Инқилоби Исломии Эронро пора мекунанд. Генерали эронӣ рӯзи 3-юми январ дар натиҷаи зарбаи мушакии Амрико кушта шуд. Ба тахмини хабаргузории Форс, теъдоди тазоҳургарон аз 700 то 1000 нафар будааст.
Хабаргузории Фаъолони Ҳуқуқи Инсон бо нашри видео дар вебсайташ навишт, ки мақомоти интизомӣ барои пароканда кардани тазоҳургарон дар Теҳрон аз гази ашковар истифода кардаанд. Эрон рӯзи 11-уми январ эътироф кард, ки низомиёни кишвар ҳавопаймои ширкати украиниро дар канори Теҳрон “тасодуфан” задаанд. Ба қавли артиш, ҳавопайморо, ки ба самти як таъсисоти махфии низомии Сипоҳи Посдорони Инқилоби Исломӣ ҳаракат кардааст, “душман” пиндошта ва бо мушак задаанд.
Доналд Трамп, раисҷумҳури Амрико бо тарафдорӣ аз тазоҳургарони “шуҷоъ” дар Эрон ҳамзамон ба ҳукумати ин кишвар ҳушдор додааст, ки чашми ҷаҳониён ба сӯйи онҳост. Баъди сарнагун кардани тасодуфии ҳавопаймои мусофирбари Украина, садҳо нафар аз эрониён ба хиёбонҳои Теҳрон рехтанд ва эътироз карданд.
Доналд Трамп, рӯзи 11-уми январ дар Твиттер навиштааст: “Ба мардуми шуҷоъ ва ранҷкашидаи Эрон. Ман аз ибтидои давраи раёсати ҷумҳуриам бо шумо истодаам ва давлати ман ҳамчунон бо шумо хоҳад истод. Мо тазоҳуроти шуморо аз наздик дунбол мекунем. Шуҷоати шумо илҳомбахш аст”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
