Вазорати корҳои дохилии Тоҷикистон мегӯяд, ки Эшони Сироҷиддин ё Сироҷиддин Абдураҳмоновро ин ниҳод боздошт накардааст. Дафтари матбуоти ин ниҳод ба “Азия-Плюс” гуфт, ки Сироҷиддин Абдураҳмонов аз сӯйи кормандони ВКД ё зерсохторҳои ин ниҳод боздошт нашудааст.
Ин дар ҳолест, ки Радиои Озодӣ бо истинод ба пайвандони Эшони Сироҷиддин хабар дода буд, ки ин руҳонии маъруф аз сӯйи “маъмуори интизомӣ” бо худ бурда шудааст. Ҳамчунин ин манбаъ гуфтааст, ки “китобу компютераш”-ро низ бурдаанд.
То кунун боздошти ин руҳонии маъруфро ҳеч ниҳоди интизомие расман таъйид накардааст. Талошҳои “Азия-Плюс” барои таъйиди ин хабар дар ниҳодҳои дигари интизомии Тоҷикистон бенатиҷа анҷомид.
Бино ба иттилои нашршуда ҳамчунин баъзе аз шогирдону ҷонибдорони ин руҳонии маъруфро низ маъмурони интизомӣ бо худ бурдаанд.
То кунун далели боздошти дубораи Сироҷиддин Абдураҳмонов маълум нест, вале бори аввал ин руҳонии маъруф соли 2009 бо гуноҳи пайравӣ ва таблиғи ҷараёни дар Тоҷикистон мамнуъи “Салафия” боздошт шуда буд, ки дар соли 2010 барои 7 сол равонаи зиндон шуд.
Аммо соли 2013 Эшони Сироҷиддин ғайриинтизор бар асоси қонуни афв озод шуд. Ин руҳонии маъруф баъди озод шудан дар шабакаҳои иҷтимоӣ ва бархе расонаҳо ба тавсифу таърифи амалкарду сиёсатҳои ҳукумат пардохт.
Солҳои ахир дар шабакаи Ютуб фаъол шуда буд ва ба суолҳои динии корбарон посух медод.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
