Имрӯз вакилони палатаи поёнии парлумони Тоҷикистон аз тағйироти пешниҳодкардаи ҳукумат ба Кодекси ҳуқувайронкунии маъмурии кишвар ҷонибдорӣ намуданд.
Мувофиқи ин тағйирот, ҷазои маъмурӣ дар соҳаи хизмати ҳарбӣ дар кишвар сангинтар мешавад.
Ба ин тариқ, вакилони парлумон ба зиёдшавии ҳаҷми ҷарима дар ҳолатҳои зерин ризоят доданд:
– барои ҳозир нашудан бо даъват ба комиссариати ҳарбӣ бе сабабҳои узрнок (аз 4 нишондиҳанда барои ҳисоб то ба 6 нишондиҳанда зиёд шуд);
– барои пешниҳод накардани рӯйхати шаҳрвандоне, ки бояд пешакӣ дар комиссариати ҳарбӣ ба қайд гузошта шаванд (аз 6 нишондиҳанда то ба 10 нишондиҳанда);
– барои ба кор қабул намудани касоне, ки уҳдадории ҳарбӣ доранд ва наврасони синни даъват, ки дар қайди ҳарбӣ нестанд (аз 2 нишондиҳанда то ба 4 нишондиҳанда);
– барои таъмин накардани огоҳии шахсони дорои уҳдадории ҳарбӣ ва наврасони синни даъват дар бораи даъвати онҳо ба комиссариатҳои ҳарбӣ (аз 6 нишондиҳанда то ба 10 нишондиҳанда);
– барои саривақт пешниҳод накардани ҳуҷҷатҳои зарурӣ ҷиҳати пешбурди баҳисобгирии ҳарбии шахсони дорои уҳдадории ҳарбӣ ва наврасони синни даъват (аз 2 нишондиҳанда то ба 4 нишондиҳанда);
– дар бораи маълумот надодан дар бораи шахсони дорои уҳдадории ҳарбӣ ва шаҳрвандони синни даъват, нақзи қоидаҳои баҳисобгирии ҳарбӣ (аз 2 нишондиҳанда то ба 4 нишондиҳанда);
– барои дидаву дониста нобуд кардан ё гум кардани ҳуҷҷатҳои баҳисобгирии ҳарбӣ (аз 6 нишондиҳанда то ба 10 нишондиҳанда);
– барои аз ҷониби даъватшаванда рад кардани гузаштан аз муоинаи тиббӣ (аз 2 нишондиҳанда то ба 4 нишондиҳанда).
Ёдрас мекунем, ки имсол ҳаҷми маблағи нишондиҳанда барои ҳисоб афзуда, 60 сомониро ташкил медиҳад (соли 2020 ба 58 сомонӣ баробар буд).
Сарбозозорӣ ё худ “дедовшина” дар артиш – натиҷаи тарбияи волидон аст
Зимни шарҳи ин тағйирот муовини аввали вазири мудофиа, сардори Ситоди кулли Қувваҳои мусаллаҳи Тоҷикистон генерал-лейтенант Эмомалӣ Собирзода ба саволи вакил Саидҷаъфар Усмонзода дар бораи сарбозозорӣ дар артиши ҷумҳурӣ посух дод.
“Ҷой доштани ба истилоҳ “дедовшина” дар артиши Тоҷикистон натиҷаи ҳамон тарбияест, ки сарбоз дар хонаводааш то даъват ба сафҳои Қувваҳои мусаллаҳ гирифтааст”, – изҳор дошт номбурда.
Ба гуфтаи ӯ, имрӯз фармондеҳони взводҳои Қувваҳои мусаллаҳ дар синни 22-солагӣ рутбаи лейтенантро мегиранд ва тарбияву омода кардани сарбозоне ба уҳдаи онҳо вогузор мегардад, ки аксарияташон аз фармондеҳи худ калонтаранд.
“Ва агар сарбози ояндаро дар хонаводааш чунин тарбия карда бошанд, пас лейтенанти ҷваон чӣ гуна дигарбора онҳоро тарбия карда метавонад?”, – бо савол муроҷиат кард ӯ.
“Имрӯз ба туфайли аксари ВАО дар ҷомеа аллакай симои манфии артиши Тоҷикистон офарида шуда, ба рӯзноманигорони “фаъол” дар ин кор мехоҳам бигӯям, ки аз хотир набароред, ки ин артиши миллии мост, ки Ватанамонро посбонӣ мекунад”, – изҳор дошт Собирзода.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
