Дар ноҳияи Ҷайҳун бар пайи моҷарои пур кадани заҳбуру онро ҳамчуни замин барои сохтани хона фурӯхтан, додситонии вилояти Хатлон алайҳи чанд мансабдори ин ноҳия парвандаи ҷиноятӣ боз карда буд.
Дар доираи ин қазия раиси ҷамоати шаҳраки Дӯстии ноҳияи Ҷайҳун Муродалӣ Асақолзода ва раиси идораи кумитаи замини ин ноҳия Тоҷиддин Сафарзода аз вазифаҳояшон барканор шуданд. Дар ин бора ба “Азия-Плюс” аз ҳукумати ноҳияи Ҷайҳун хабар доданд.
Манбаъ мо дар ҳукумати Ҷайҳун мегӯяд, сабаби барканории ин ду мансабдори маҳаллӣ ҳамон моҷарои пур кардани заҳбуру тақсими он ба шаҳрвандон мебошад.
Бояд гуфт, ки қаблан баъди нашри хабари “Дар Ҷайҳун заҳкашеро пуркардаву заминашро барои хонасозӣ тақсим кардаанд” дар "Азия-Плюс", Додситонии вилояти Хатлон санҷиш гузаронида, алайҳи раиси пешини ҷамоати Қумсангир, ки ҳоло раиси ҷамоати Дӯстии ноҳияи Ҷайҳун мебошад ва муҳандиси заминдории ҳамин ҷамоат, парвандаи ҷиноятӣ боз карда буд.
Парванда бар асоси моддаи 247 қисми 3 банди “а” (қалобӣ) ва моддаи 3381 банди “б, в” (ғайриқонунӣ додани қитъаи замин)- и Кодекси ҷиноӣ боз шуда буд..
Он замон Рустам Сангинзода, сардори бахши назорати иҷрои қонунгузории замини додситонии вилояти Хатлон гуфта буд, ки баъди нашри хабар дар бораи пур кардани заҳкаш ва тақсими он ҳамчун замини наздиҳавлигӣ, тибқи супориши додситони вилоят санҷиш гузаронида шуд.
“Дар рафти санҷиш маълум шуд, ки Муродалӣ Асақолзода дар давраи раиси ҷамоати деҳоти Қумсангири ноҳияи Ҷайҳун кор кардан дар ду ҳолат аз шаҳрвандон бо ваъдаи ба расмият даровардани ҳуҷҷатҳои масҷидҳои панҷвақтаи “Суғдиён” 50 ҳазор ва деҳаи Тоҷикистон 20 ҳазор сомонӣ гирифтааст".
Ба гуфтаи ин масъули додситонӣ, ҳамчунин санҷиш маълум кард, ки Муродалӣ Асақолзода бо ваъдаи ҷудо кардани қитъаи замини наздиҳавлигӣ аз сокини деҳаи Ҷуйбори ҷамоати деҳоти Қумсангир Маҳмадалӣ Забиров 16 ҳазор сомонӣ гирифтааст. Дар ҳамин ҳолат бо маслиҳати пешакӣ бо муҳандиси заминдории ҳамин ҷамоат Фазлиддин Ғоибов ба Маҳмадалӣ Забиров 03, га замин ҷудо карда додаанд”,- гуфт Рустам Сангинзода.
Алайҳи Фазлиддин Ғоибов низ, ин ниҳод он замон гуфта буд, дар доираи парвандаи ҷиноӣ тафтишотро идома медиҳад. Аммо ҳоло маълум нест, ки алайҳи раиси кумитаи замини ноҳия Тоҷиддин Сафарзода низ дар ин парванда тафтишот сурат гирифтааст ё не.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
