Корвони иборат аз 28 мошини пурбор бо кӯмаки моддии сокинони ҳамсояшаҳри Конибодом рӯзи 8 май ба аҳолии дар муноқишаҳои сарҳадӣ зарардида вориди Исфара гардид.
Тавре хадамоти матбуоти раиси вилояти Суғд иттилоъ медиҳад, конибодомиҳо дар пайгирӣ аз анъанаҳои неки ҳамсоядорӣ ба сокинони ҷамоатҳои деҳоти Чоркуҳ ва Ворух, ки аз низои мусаллаҳона зарар дидаанд,ҷиҳати бартараф намудани оқибатҳои ҳодисаи санаи 29 апрел рухдода дасти мадад дароз намуднд.
Гуфта мешавад, бо иқдоми ҷомеаҳои меҳнатии шаҳри Конибодом барои оилаҳои осебдидаи деҳаҳои Сомониён ва Хоҷаи Аълои ҷамоати деҳоти Чоркӯҳ масолеҳи сохтмон, аз ҷумла зиёда аз панҷ ҳазор дона хишт, 4 тонна семент, 2200 дона сементблок, сарулибос, пойафзол, қолину рахти хоб, дигар маводи рӯзгор, ашёи хониш ва маводи хӯрока дастрас карда шуд.
Зикр мешавад, ки бо дастури президенти Тоҷикистон Эмомалӣ Раҳмон дар муддати як моҳ тамоми манзилҳои истиқоматии харобгардида ва осебрасида бепул пурра бунёду барқарор гардида, бо маводи зарурии рӯзгор таъмин карда мешаванд.
Ба иттилои манбаъ, айни замон дар шаҳри Исфара ҷиҳати барқарорсозии хонаҳои истиқоматии минтақаҳои наздимарзӣ ситоди кории шабонарӯзӣ фаъол буда, дар ин самт чораҳои зарурӣ амалӣ шуда истодаанд.
Тибқи омори расмӣ, дар ҷараёни даргириҳои сарҳадии рӯзҳои 29-30 апрел дар ҷамоатҳои наздимарзии Исфара 17 хона пурра ва 38 манзил қисман тахриб шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
