Вазорати нақлиёти Тоҷикистон ба оғози сохтмони роҳи мошингарди Хоҷаи Аъло – Ворух пас аз мувофиқаи ин масъала бо ҳукумати Қирғизистон омода аст.
“Бо дастури комиссияи байниҳукуматӣ мо дар ҳама гуна вақт ба баргузории корҳои топографӣ ва сохтмон омодаем”, – изҳор дошт зимни нишасти матбуотии рӯзи 17 феврал вазири нақлиёти Тоҷикистон Азим Иброҳим.
Ӯ зикр кард, ки намояндагони вазорат дар гуфтушуниди ҳайатҳои ҳукумати ду кишвар дар ин бора иштирок карда, дар бораи сохтмони роҳи мазкур тавофуқ ҳосил шуда буд, лекин баъдан ин корҳо мавқуф гузошта шуданд.
Ин ҷо сари протоколи рӯзи 1 майи соли гузашта имзошудаи №39 сухан меравад, ки дар он гуфта мешавад, роҳи Хоҷаи Аъло – Ворухро ҳар ду ҷониб месозанд.
Он замон ҳайати ҳукуматҳо ба мувофиқа расида буданд, ки то анҷоми корҳои таъйину аломатгузории марз барои ҳаракати бемамониати воситаҳои нақлиёт ҷонибҳо роҳи мошингарди “Хоҷаи Аъло-Ворух”-ро дар хамгашти самти шарқии нуқтаи аҳолинишини Тангӣ (Капчигай) якҷоя месозанд ва ҷониби Тоҷикистон онро истифода ва нигоҳдорӣ мекунад.
Аммо бо гузашти қариб 10 моҳ ҷонибҳо ҳатто ба корҳои пешакии сохтмони роҳ оғоз накардаанд, ки яке аз сабабҳои аслии рӯйдодҳои хунини рӯзҳои 27-28 январ дар марзи Тоҷикистону Қирғизистон дониста мешавад.
Мутобиқи протокол, ҷонибҳо роҳро бояд якҷоя созанд, лекин ҳукумати Қирғизистон бар хилофи қарордоди имзошуда исрор меварзад, ки роҳро худаш бунёд мекунад.
Ҷониби Қирғизистон инро чунин шарҳ медиҳад, ки аҳолии маҳаллӣ мухолифи сохтмони ин роҳ аст, зеро он вилояти Боткандро ба ду қисмат ҷудо мекунад.
“Ман дар ин бора ошкоро гап мезанам. Онҳо дархост мекунанд, ки сохтмони роҳи Ворух оғоз шавад. Мо роҳро баста наметавонем, он ҷо 40 ҳазор нафар зиндагӣ мекунанд. Роҳ тариқи Капчигай мегузарад. Лекин роҳро худамон месозем ва барои ин маблағ ҳам дорем”, – изҳор дошта буд охири моҳи январ ба хабаргузории 24.kg раиси КДАМ Қирғизистон Қамчибек Тошиев.
Бино ба маълумоти ӯ, Қирғизистон ҳам шартҳои худро гузоштааст.
“Роҳи мошингард ба Ворух медиҳем, лекин ҳамзамон мо бояд корҳои таъйину аломатгузориро дар ҳамаи хати сарҳад ба анҷом расонем”, – илова карда буд раиси КДАМ -и кишвари ҳамсоя.
Аз масофаи умумии 976 километр сарҳади давлатӣ байни Тоҷикистону Қирғизистон то имрӯз танҳо 504 километри он таъйину аломатгузорӣ шудааст.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
