Нисбати хонандаи мактаби №5-и дар шаҳри Кӯлоб, ки ба куштори ҳамсинфи худ бо зарби корд гумонбар аст, барои авбошӣ (моддаи 237 қисми 3 банди а) ва куштори одам аз ҳиссиёти авбошӣ (моддаи 104 қисми 2 банди а,к) парвандаи ҷиноятӣ боз гардидааст.
Дар ин бора Қутбиддин Достизода, додситони шаҳри Кӯлоб дар суҳбат бо “Азия-Плюс” хабар дод.
Номбурда гуфт, гумонбар 17-сола буда, сокини маҳаллаи Шамсиддин Шоҳини шаҳри Кӯлоб мебошад.
Ному насаби хонандагон барои “Азия-Плюс” маълум аст ва бо далели ҳуқуқӣ онро нашр намекунад.
Як манбаи дигари “Азия-Плюс” аз додситонии шаҳри Кӯлоб гуфт, ки гумонбар барои қасосгирӣ ба тани ҳамсинфаш дар соати дарсӣ корд задааст.
“Аз рӯи баёноти гумонбар маълум шуд, ки марҳум ба истилоҳ “зӯр”-и синфашон будааст ва чанд маротиба гумонбарро задаву мазоқ карда будааст. Ҳатто пеш аз кордзанӣ ҳам дар саҳни мактаб ӯро бо мушт зада, таги чашмашро сиёҳ кардааст. Баъди ин гумонбар бо ҳисси қасдгирӣ, дар даст корд гирифта, дар паҳлӯи марҳум мешинад ва 5 дақиқа пеш аз занг ба шиками ӯ корд мезанад”, – шарҳ дод ӯ рафти ҳодисаро.
Гуфта мешавад, ки омӯзгорон, аз ҷумла директори мактабе, ки ҳодиса рух дод ва роҳбари синфи хонандагон бозпурсӣ шудаанд ва эҳтимоли зиёд нисбати роҳбари синф чораи маъмурӣ андешида шавад.
Ҳоло гумонбар дар боздошт аст ва тафтишот нисбати ин ҳодиса идома дорад.
Моддаҳои қайдгардида, аз ҷумла, 104, ки одамкушӣ аст, аз 15 то 20 соли зиндон ва 237, ки авбошӣ аст, то 2 соли зиндон пешбинӣ кардааст.
Тибқи иттилои расмӣ ҷиноятҳое, ки аз ҷониби ноболиғон дар соли гузашта дар шаҳри Кӯлоб содир шудаанд, дар маҷмӯъ 27 ададро ташкил медиҳад, ки ин нисбат ба соли 2021 (10 адад)- 17 адад зиёд мебошад.
Ёдовар мешавем, ки рӯзи 31-уми марти соли равон дар мактаби №5-и шаҳри Кӯлоб миёни ду хонандаи синфи 10 занозанӣ ва кордкашӣ сар зад, ки дар натиҷа, яке аз хонандаҳо бо захмӣ корд ба беморхона интиқол ва бо гузашти як рӯз даргузашт. Худи ҳамин рӯз гумонбар дастгир гардида буд.
Қаблан низ занозанӣ ва кордкашӣ миёни хонандагон рух дода буд, ки дар он гоҳе ҷавонон аз корду силоҳҳои дигар истифода мекарданд. Додгоҳи олии Тоҷикистон дар моҳи январ як ноболиғро барои занозанӣ ва қатли ҳамсолаш ба 11 сол зиндон маҳкум кард.
