Вазорати корҳои хориҷии Тоҷикистон фаъолияти Консулгарии генералии Афғонистонро дар шаҳри Хоруғи Бадахшон, ки ба қавли “сарпараст”-и он “таҳти ҳимоят ва ҳидояти Вазорати корҳои хориҷии ҳукумати Толибон* фаъолият дорад”, шарҳ намедиҳад. Дар ин бора аз ВКХ ба “Азия-Плюс” хабар доданд.
Се рӯз пеш, 10-уми ноябр, Нақибулло Деҳқонзода ном шахс, ки худро сарпарасти консулгарии генералии ҳукумати Толибон дар шаҳри Хоруғи Тоҷикистон муаррифӣ кард, бо нашри наворе дар шабакаи “Х” (“Твиттер”-и пешин) гуфт, ки “Консулгарии генералии Афғонистон дар шаҳри Хоруғи Тоҷикистон расман фаъолият мекунад ва он мустақил буда, мустақиман таҳти ҳимоят ва ҳидояти Вазорати умури хориҷии ҳукумати Толибон қарор дорад.
Ӯ ин иддаои худро дар посух ба баёнияи Муҳаммад Зоҳири Ағбар, сафири ҳукумати пешини Афғонистон дар Тоҷикистон, ки гуфт, консулгарии Афғонистон дар Хоруғ “барои надоштани имконоти иқтисодӣ” аз кор мондааст, иброз намуд.
Имрӯз, 13-уми ноябр, дар ВКХ ба “Азия-Плюс” аз шарҳи суханони Нақибулло Деҳқонзода худдорӣ карда, кӯтоҳ гуфтанд, ки “ин масъаларо шарҳ намедиҳем”.
Сабаби шарҳ надодани ин мавзӯъро ҳам нагуфтанд.
Нақибулло Деҳқонзода дар он навор гуфта буд, ки “баъд аз суқути низоми ҷумҳурият доманаи фаъолиятҳои ин намояндагӣ дар бахшҳои ироаи хадамот ба атбои Афғонистон ва хориҷии муқими Тоҷикистон аз ҷумла, табдили шиноснома, судури васоит ва раводид, ҳамкории дуҷониба ва расидагӣ дар баҳсҳои транзит, тиҷорат, масоили марзӣ, зиндониёни ҳуқуқӣ ва ҷиноӣ дар ҳамоҳангӣ бо мақомоту вазорати зирабти Тоҷикистон густариш пайдо кардааст”.
Вай Афғонистону Тоҷикистонро ду кишвари дӯсту бародар хонда, ба роҳбарияти Тоҷикистон “барои азсаргирии хадамоти марзӣ, боз шудани бозорчаҳои муштараки марз дар Вилояти Бадахшон ва ҳамчунин, кумакҳои қобили мулоҳизаи башардӯстона ба осебдидагони зилзилаи вилояти Ҳирот” миннатдорӣ кард.
Рӯзи 10-уми ноябр Зоҳири Ағбар, сафири ҳукумати пешини Афғонистон, ки худро намояндаи расмии мардуми ин кишвар дар Тоҷикистон медонад, дар суҳбат бо “Азия-Плюс” аз шарҳи бештари иддаои Нақибулло Деҳқонзода худдорӣ кард ва танҳо гуфт, “консулгарии генералии Афғонистон дар шаҳри Хоруғ аз тарафи сафорат 8 моҳ ба ин сӯ тавассути ёддошти расмӣ ба таълиқ андохта шудаааст”.
Дар ҳамин ҳол, номаълум аст, ки оё дар Тоҷикистон ҳам намояндаи ҳукумати пешини Афғонистон ва ҳам ҳукумати кунунии Толибон фаъолият доранд.
Бинои консулгарии генералии Афғонистон дар Хоруғ моҳи феврали имсол дар пайи фаромадани тарма вайрон шуда буд. Баъди ин расонаҳои Афғонистон хабар доданд, ки як ҳайати ҳукумати Толибон барои боздид ба Хоруғ омадаанд. Мақомоти Тоҷикистон хабари омадани намояндагони Толибонро ба шаҳри Хоруғ тасдиқ ё рад накардаанд.
Гуфтан зарур аст, ки то кунун як қатор кишварҳо, аз ҷумла Чин, Эрон, Русия ва Туркия сафоратҳои Афғонистонро ба намояндагони расмии Толибон таслим карда, дипломатҳои ин гурӯҳро пазируфтаанд.
Тоҷикистон аз кишварҳое мебошад, ки бо Толибон расман ҳеҷ гуна равобит надорад. Бо ин вуҷуд, додугирифти мол ва фурӯши барқ байни Тоҷикистону Афғонистон ҳамчунон идома дорад. Дар Душанбе то ҳол сафири ҳукумати пешини Афғонистон ба ҳайси намояндаи мардуми ин кишвар фаъолият мекунад.
