Муассисаи давлатии “Маркази барномаҳои байналмилалӣ” – и Вазорати маориф ва илми Ҷумҳурии Тоҷикистон барои таҳсил дар донишгоҳҳои беш аз 50 кишвари пешрафтаи ҷаҳон ҳуҷҷат қабул мекунад. Дар ин бора Вазорати маориф ва илми кишвар хабар медиҳад.
Бино ба иттилои манбаъ, таълим дар зинаҳои бакалавр, магистратура, аспирантура, докторантура, коромӯзӣ ва ординатураи клиникӣ тибқи Стипендияи байналмилалии Президенти Ҷумҳурии Тоҷикистон “Дурахшандагон” амалӣ карда мешавад.
Гуфта мешавад, довталабоне, ки шаҳодатномаҳои байналмилалии TOEFL, IELTS, Duolingo, Goethe, TOPIK доранд ва забонҳои хориҷиро медонанд, метавонанд муроҷиат намоянд. Хароҷоти таҳсил пурра аз ҳисоби фонди махсуси Президент пардохт мешавад.
Дар баробари ин, ҷиҳати таҳсил дар зинаи магистратураи донишгоҳҳои пешрафтаи Аврупою Амрико, Сингапуру Австралия ва дигар давлатҳои ҷаҳон аз рӯйи 9 ихтисос квотаҳо пешбинӣ шудаанд.
Дар зинаҳои аспирантура ва докторантура, коромӯзӣ ва ординатураи клиникӣ аз рӯйи ихтисосҳои замонавӣ ва ҷавобгӯ ба талаботи бозори меҳнат низ квотаҳо пешниҳод шудаанд.
“Маблағи таҳсил, иқомат дар хобгоҳ, суғуртаи тиббӣ, стипендияи моҳона, роҳкирои донишҷӯён, мутобиқгардонӣ ба стандарти давлати дахлдор, барасмиятдарории раводид, нашри натиҷаҳои илмҳои таҳқиқоти илми довталабоне, ки аз санҷиши Комиссияи интихоб ва тайёр намудани мутахассисон дар давлатҳои хориҷӣ мегузаранд, пурра пардохт мегардад”, – гуфта шудааст дар хабари мазкур.
Талаботи асосӣ барои довталабон донистани забонҳои хориҷӣ (англисӣ, кореягӣ, олмонӣ ё чинӣ), вобаста ба кишваре, ки онҳо ба донишгоҳ дохил мешаванд, мебошад.
“Донишгоҳро худи довталаб интихоб мекунад ва давлат ба ӯ чанд ихтисосро пешниҳод мекунад, ки аз онҳо интихоб кунад. Пас аз хатми таҳсил ба шумо лозим меояд, ки ба Тоҷикистон баргардед ва 4-5 сол дар ягон самти муассисаи давлатӣ кор кунед”, – шарҳ доданд дар марказ ба “Азия-Плюс”.
Пас аз пешниҳоди ҳуҷҷатҳо, довталаб аз имтиҳон ва сипас аз ҷониби Комиссия мусоҳиба гузаронида мешавад.
Ҳар як шахс метавонад ҳуҷҷатҳои худро ба “Маркази барномаҳои байналмилалӣ” то 1-уми марти соли равон пешниҳод кунад.
Кадом ҳуҷҷатҳо лозиманд?
– нусхаи шиносномаи довталаб ва падару модар;
– шаҳодатнома дар бораи мавҷудият ё набудани доғи судӣ;
– маълумотномаи тиббии шакли 0,86 ё 0,38 ва ВИЧ/СПИД;
– справка аз диспансерҳои наркологӣ ва психоневрологӣ;
– хислатнома аз ҷойи таҳсил ва кор;
– шаҳодатнома дар бораи таҳсилоти миёнаи пурра ё диплом;
– расид аз Амонатбонк ба маблағи 120 сомонӣ;
– шаҳодатномаи TOEFL, IELTS, DUOLINGO, GOETHE, H&C;
– сурати 3×4 1 дона.
Барои гирифтани маълумоти иловагӣ метавонед ба Муассисаи давлатии “Маркази барномаҳои байналмилалӣ” бо суроғаи: ш.Душанбе, к. Мирзо Турсунзода, 47 (ҷойгир: Маркази савдои "Пойтахт", варзишгоҳи "Спартак") ё телефони 223 23 59 муроҷиат кунед.
