Мақомот дар ноҳияи Файзобод як ҷавони 33-соларо бо гумони куштори дӯсташ боздошт кардаанд. Ба иттилои Вазорати корҳои дохилии кишвар, қисмҳои ҷасади кушташуда рӯзи 19-уми апрел дар деҳаи Саричашмаи ноҳияи Файзобод, дар соҳиди рӯдхонаи Элок пайдо шудаанд.
Ин ниҳод аз гумонбар, ки баъди ду рӯзи пайдо шудани ҷасад боздошт шудааст, Нурандеш Шарифзодаи 33-сола ном бурдааст. Ӯ сокини кӯчаи Норакиёни шаҳри Роғун будааст.
Ба иттилои манбаъ, ҳодиса рӯзи 31-уми декабри соли 2025 рух дода, Нурандеш Шарифзода ҳамроҳ бо Насим Раҷабзодаи 43-сола, ки сокини ноҳияи Фархор будааст, дар ҳолати “мадҳушӣ” муноқиша мекунад ва сипас, ӯро ба қатл мерасонад.
Маълум нест, ки далели муноқишаи онҳо чӣ буд.
Гуфта мешавад, ки ӯ ҷасадро ду рӯз нигоҳ дошта, сипас “барои рӯйпӯш кардани ҷиноят ҷасадро бо истифода аз табар ва арраи оҳанбурӣ ба қисмҳо ҷудо карда, як қисми ҷасадро дар таҳхонаи манзили иҷоравиаш зери хок карда, қисми дигарро дар халта ҷой намуда, дар лаби дарёи Элок, воқеъ дар ноҳияи Файзобод бурда партофтааст.
Аммо гуфта намешавад, ки ӯ ҷасадро ду рӯз дар куҷо нигоҳ дошт.
Шарифзода дар навори нашркардаи мақомот гуфтааст, баъди ду рӯзи истеъмоли маводи мухаддир ба ин кор даст задааст.
Аммо маълум нест, ки ин навор таҳти кадом шароит сабт шудааст.
Мақомот нисбати ӯ бо гумони одамкушӣ (моддаи 104-и КҶ) парвандаи ҷиноӣ боз кардаанд ва тафтиши қазия идома дорад. Ин банди қонун аз 8 соли зиндон то ҳабси абад пешбинӣ мекунад.
Назари гумонбар ва наздиконаш дар робита ба ҳодиса дастрас нест.
Ба иттилои ВКД, Нурандеш Шарифзода қаблан барои “дуздӣ ва авбошӣ” 15 сол зиндонӣ шуда буд.
