Дар пайи интиқоди Эмомалӣ Раҳмон, раиси ҷумҳури Тоҷикистон аз фаъолияти мақомоти қудратии вилояти Хатлон ва супориши ӯ оид ба барканории чанде аз роҳбарони ин мақомот дар вилоят ва дастгоҳи марказӣ, генерал Саиднахш Раҳмонзодаи 62-сола аз вазифаи муовини вазири корҳои дохилӣ озод карда шуд.
Сабаби аз ин вазифа рафтани ӯ, “ба кори дигар гузаштан” гуфта мешуд. Як ҳафта пас маълум шуд, ки ӯ сардори муассисаи нақлиётии ВКД таъин шудааст.
Ӯ камтар аз 4 сол дар мақоми муовини вазири корҳои дохилӣ кор кард ва аз ин пеш, наздики 12 сол сардори Раёсати сохтмони асосии ин ниҳод буд.
Ба ҷои Раҳмонзода, рӯзи 2-юми феврали соли равон Ғайратшо Муборакшозодаи 47-сола, ки то ин дам муовини сардори Раёсати ВКД дар ВМКБ буд, муовини вазир таъин шуд. Ӯ полковини милитсия буда, аз соли 1999 дар мақомоти корҳои дохилии кишвар кор мекунад.
Бояд гуфт, ки номи Ғайратшо Муборакшозода ҳамагӣ як маротиба моҳи майи соли 2022 ва дар пайи эътирози гурӯҳе аз сокинон дар шаҳри Хоруғ расонаӣ шуд. Он замон мақомот дар эъломияе гуфтанд, ки дар пайи “ҳамлаи яке аз норозиён ва таркиши норинҷак” Муборакшозода ва баъзе аз ҳамроҳонаш маҷруҳ шуданд.
Номбурда ба эҳтимоли зиёд зодаи ВМКБ аст ва ду маротиба Академияи ВКД Тоҷикистонро хатм кардааст. Бори аввал соли 1999 бо ихтисоси ҳуқуқшинос ва бори дуввум 10 сол баъд, соли 2009 факултети №1 ин муассиса барои ҳайати роҳбарикунандаро хатм кардааст.
Ӯ фаъолияташро дар сафи мақомот аз вазифаи муфаттиши шуъбаи тафтишотии Раёсати ВКД дар ВМКБ шурӯъ карда, то муовини сардори ин раёсат ва ҳамин тариқ, муовини вазир расид.
Ғайратшо Муборакшозода пеш аз фаъолияти дубора дар раёсати ВКД дар ШКД дар ноҳияи Хоруғ низ ҳамчун муфаттиши калони гурӯҳи тафтишотӣ, муфаттиши калони шуъбачаи тафтишотӣ, сардори шуъбачаи тафтишотӣ кор кардааст.
Баъдан ҳамчун сардори шуъбаи тафтишотӣ ба Раёсати ВКД дар ВМКБ ба кор мегузарад. Дар ин миён ҳамчун сардори ШКД дар ноҳияи Шуғнон низ кор кардааст.
Ҳамин тариқ, дубора ба раёсат ба ҳайси муовини сардори оид ба самти оперативӣ бармегардад, ки билохира моҳи феврали соли равон муовини вазири корҳои дохилии Тоҷикистон мешавад.
Сомонаи ВКД менависад, ки ӯ “зимни фаъолияти хизматӣ барои зоҳир намудани малакаю маҳорати баланди касбӣ бо як қатор медалу нишонҳои сарисинагӣ, ифтихорномаю сипосномаҳои ВКД мукофотонида шудааст”.
Муборакшозода медали “Ҷасорат” ва медали “Хизмати шоиста” низ дорад.
