Ба навиштаи Додгоҳи шаҳри Хуҷанд, Умарҷон Абдуҷабборов, сокини 47-солаи шаҳри Хуҷанд ба он гунаҳкор шудааст, ки соли 2020 ба Русия барои муҳоҷирати корӣ рафта, дар онҷо ба тарғибу паҳн кардани ақидаҳои ифротии мубаллиғони ташкилоти экстремистии равияи динии “Салафия” машғул шудааст.
“ Умарҷон Абдуҷабборов дар хонаи иҷорагирифтааш бо ду нафар дӯстонаш оши ҳарифона ташкил карда, бештар сари таблиғи ақидаҳои ифротии мубаллиғони ташкилоти экстремистии равияи динии “Салафия” суҳбат мекардааст ва тириқи шабакаҳои иҷтимоии “Мессенҷер” ва “Вотсап” сабти овозу наворҳои хусусияти ифротгароидоштаро ирсол кардааст”, – зикр мегардад дар ҳукми додгоҳ.
Ба навиштаи манбаъ, Умарҷон Абдуҷабборов соли 2023, вақте ба шаҳри Хуҷанд баргашта, ба кирокашӣ машғул буд, боздошт ва охири ҳамон сол дар асоси моддаи 307 қисми 2 Кодекси ҷиноятии ҶТ ба 5 соли зиндоз маҳкум шудааст.
Бояд гуфт, ки фаъолияти равияи динии “Салафия” аз соли 2009 ба инҷониб дар Тоҷикистон мамнӯъ буда, аз соли 2014 бо қарори Додгоҳи олии кишвар созмони экстремистӣ эълон шудааст.
