Давоми нимсолаи аввали соли ҷорӣ берун аз кишвар 80 шаҳрванди Тоҷикистон, ки дар кофтуков қарор доштанд, аз ҷониби мақомоти дахлдори кишварҳои хориҷӣ дастгир ва ба Тоҷикистон истирдод шуданд. 76 нафар дар Русия ва 4 нафар дар Қазоқистон боздошт ва ба Тоҷикистон истирдод шуданд.
Дар ин бора Умед Каримзода, муовини аввали додситони кулли кишвар дар нишасти матбуотии 9-уми август хабар дод.
Ӯ гуфт, дар ин давра аз Тоҷикистон ягон ҷинояткор ё шахси хориҷие, ки дар ҷустуҷӯй буд, боздошт ва ба хориҷи кишвар истирдод нашудааст.
Ин дар ҳолест, ки Юсуф Раҳмон, додситони кулли Тоҷикистон рӯзи 16-уми феврали соли ҷорӣ дар нишасти матбуотӣ гуфта буд, соли 2023 Тоҷикистон бо дархости мақомоти прокуратураи дигар кишварҳо 30 нафарро дастгир ва ба он кишварҳо супоридаанд.
Ҳамин тариқ, соли 2023 беш аз 200 ҷинояткор бо дархости Тоҷикистон боздошт ва ба кишвар истирдод шуданд, ки ин нисбат ба соли 2022-юм 100 нафар бештар буд.
Дар 6 моҳи соли равон чанд ҳолати истирдоди шаҳрвандони Тоҷикистон, аз ҷумла аз кишварҳои Аврупо ва Русия расонаӣ шуда буд. Наздикону пайвандони баъзе афроди истирдодашуда чунин амали мақомотро беасос медонанд. Вале мақомоти Тоҷикистон мегӯянд, истирдоду муҷозоти сокинон беасос набуда, далелҳое рӯи даст доранд.
