Дар Душанбе вазири нақлиёти Тоҷикистон Азим Иброҳим ва роҳбари калони бахши нақлиётии Фонди авруосиёии мӯътадилсозӣ (субот) ва рушд (ФАМР) Александр Рашиков имкони сохтмони долонҳои зиддитармавиро дар қитъаҳои осебпазири роҳҳои мошингарди ҷумҳурӣ баррасӣ карданд.
Тавре ки Вазорати нақлиёти ҷумҳурӣ хабар медиҳад, дар мулоқоти ҷонибҳо, аз ҷумла сохтмони 51 чунин долонҳо бо масофаи умумии 5,2 ҳазор метр барои таъмини бехатарии ҳаракат дар роҳ дар давраи зимистон баррасӣ шуд.
Вазорати нақлиёт дар бораи мушаххасан кадом роҳҳо будан хабар намедиҳад, лекин дар вохӯрӣ директори МД «Маркази татбиқи лоиҳаи барқарорсозии роҳи автомобилгарди "Душанбе-Чанок" дар назди ҳукумати Тоҷикистон Зафар Шарифзода низ ҳузур доштааст.
“Иштирокчиёни вохӯрӣ доир ба зарурати иҷрои ҳарчи зудтари лоиҳа баҳри беҳбуди вазъи бехатарии ҳаракат дар роҳ изҳори итминон карданд, – зикр карданд дар Вазорат. – Бахши нақлиёти автомобилгард бинобар сабаби шароитҳои хоси иқлимӣ ва мавқеи ҷуғрофии кишвар аҳаммияти бузург дорад: ҳамлу нақли зиёда аз 93,4% бор ва 99,8%-и мусофирон маҳз тариқи нақлиёти автомобилӣ анҷом дода мешавад”.
Дар Вазорати нақлиёт хабар доданд, ки айни замон ба сурати умум 12 лоиҳа ба маблағи зиёда аз 1 млрд доллар мавриди амалишавӣ қарор дорад, ки дар доираи созишномаҳои қарзӣ ва грантӣ сармоягузорӣ шудаанд.
Маълумотномаи “Азия-Плюс”
Фонди авруосиёии субот ва рушд (ФАСР) механизми минтақавии молиявӣ бо ҳаҷми зиёда аз 9 млрд доллар мебошад, ки соли 2009 аз ҷониби давлатҳои Арманистон, Беларус, Қазоқистон, Қирғизистон, Русия ва Тоҷикистон таъсис дода шудааст.
Мусоидат ба устувории иқтисодӣ ва молиявӣ дар кишварҳои узви Фонд, инчунин дастгирии онҳо дар самти таъмини рушди устувор аз ҳадафҳои ФАСР унвон мешаванд.
