Шоҳкитоби Абӯалӣ ибни Сино – “Қонуни тиб” дар Озмуни XXI байналмилалии “Санъати китоб”-и давлатҳои аъзои Иттиҳоди Давлатҳои Мустақил соҳиби Шоҳҷоиза гардид. Дар умум, ноширони Тоҷикистон 12 мақом ба даст оварданд.
Дар шаҳри Москав санаи 6-уми сентябр натиҷаҳои озмуни байналмилалии “Санъати китоб” эълон ва ғолибон қадрдонӣ гардиданд. “Шоҳҷоиза”-и озмунро китоби “Қонуни тиб”-и Абӯалӣ ибни Сино, ки дар як муҷаллади бузурги хуштарҳ бо хати сириллик тавассути сарредаксияи илмии “Энсиклопедияи миллии тоҷик” нашр гардид, сазовор гардид.
Озмуни мазкур санаи 7-8 август дар пойтахти Тоҷикистон – шаҳри Душанбе аз рӯйи 10 номина баргузор шуд. Дар он наширони давлатҳои ИДМ бо маҳсули кори хеш ширкат варзиданд. Аз Тоҷикистон нашриёти “Ирфон”, Сарредаксияи илмии “Энсиклопедияи миллии тоҷик”, нашриёти “Адиб” бо китобҳои нашркардаи худ иштирок намуда, дар номинаҳои гуногун сазовори 12 мақом гардиданд.
Аз ҷумла, китобҳои "Гулчини ғазалиёт"-и Мавлоно Ҷалолуддини Балхӣ дар номинаи "Муколамаи фарҳангҳо" ва китоби "Саёҳатнома"-и Саид Аҳмад Давлаҳмад дар номинаи "Китоб барои кӯдакону наврасон" сазовори ҷойи аввали озмуни мазкур гардиданд.
Китобҳои "Ҷумҳурии Тоҷикистон" дар номинаи "Кишвари ман", "Донишномаи мухтасари бузургони форсу тоҷик" дар номинаи "Илм ва маориф" ва китоб-албоми "Тоҷикистон" дар номинаи "Китоби мусаввар" ҷойи дуюмро соҳиб гаштанд.
Китобҳои "Ахтарони илм" дар номинаи "Санъати тазйин", "Тоҷикон"-и аллома Бобоҷон Ғафуров дар номинаи "Дар Иттиҳод чоп шудааст" ва китоби "Донишномаи фарҳанги мардуми тоҷик" дар номинаи "Иттиҳод" сазовори ҷойи сеюми ин озмуни байналмилалӣ гардиданд.
Озмуни байналмилалии “Санъати китоб” аз соли 2004 инҷониб бо мақсади тавсеаи ҳамкориҳои байналмилалӣ байни ноширони китоб, баланд бардоштани фарҳанги нашри китоб, таблиғи беҳтарин дастовардҳои нашриётҳо ва табодули арзишҳои маънавию фарҳангӣ байни кишварҳои узви ИДМ баргузор мешавад. Муассиси он Шӯрои байнидавлатии ҳамкорӣ дар соҳаи матбуоти даврӣ, нашри китоб, тавзеъи китоб ва полиграфия мебошад. Имсол ҳайати ҳакамони ҷаласаи 21-уми озмунро шаҳри Душанбе мизбонӣ кард.
