Дар вилояти Волгоград аз соли оянда барои муҳоҷирон кор дар соҳаҳои маориф, тандурустӣ, ронандагӣ, тиҷорат, таъмири нақлиёт ва колорасонӣ иҷозат дода намешавад. Дар ин бора қарори дахлдорро Андрей Бочаров, ҳокими ин вилоят имзо кардааст.
Гуфта мешавад, ин маҳдудиятҳо аз соли 2025 ба иҷро медароянд. Кор дар соҳаҳои мазкур танҳо ба муҳоҷирони меҳнатие, ки бо иҷозатнома (патент) кор мекунанд, манъ хоҳад шуд.
Ба гуфтаи мақомоти вилояти Волгоград, ин тасмим ба мувозинати рушди бозори меҳнати минтақа ва баланд бардоштани рақобатпазирии корҷӯёни маҳаллӣ мусоидат мекунад.
“Системаи нав инчунин имконият медиҳад, ки ҷараёни ҷалби муҳоҷирони меҳнатӣ танзим шавад ва таваҷҷуҳ ба мутахассисони баландихтисоси хориҷӣ равона гардад. Чунин мутахассисон, одатан, тибқи дархости корфармо ва раводиди меҳнатӣ кор мекунанд, на бо иҷозатнома (патент)”, – омадааст дар изҳороти мақомоти минтақа.
Боз дар кадом минтақаҳои Русия маҳдудиятҳо ҷорӣ шуданд?
Аллакай, чанд сол мешавад, ки кор барои муҳоҷирон дар аксари минтақаҳои Русия маҳдуд мешавад. Танҳо давоми ду ҳафтаи охир чанд минтақа фаъолияти муҳоҷиронро дар бахшҳои мухталиф манъ карданд.
Чанд рӯз пеш, ҳокими вилояти Сахалин Валерий Лимаренко ҳам дар 24 соҳа кор барои муҳоҷиронро манъ карда буд.
Шурӯъ аз соли 2025 дар вилояти Твери Русия низ фаъолияти муҳоҷиронро дар 46 соҳаи дигар манъ мекунанд. Агар дар соли 2024 муҳоҷирони корӣ ҳаққи кор дар 36 бахшро дар ин минтақа надоштанд, дар соли оянда ин феҳрист ба 82 адад мерасад.
Аз ҷумла, дар вилояти Нижний Новгород сар аз соли 2025 кор барои муҳоҷирон дар 37 соҳа, аз ҷумла, дар соҳаҳои маориф, тандурустӣ, хидматрасониҳои иҷтимоӣ ва фарҳангӣ то истихроҷи захираҳои маъдан, колорасонӣ, савдо, хӯрокпазӣ, сайёҳӣ, молия, суғурта ва нақлиёт манъ мешавад.
Гуфта мешавад, ки ҳукумат ба корфармоён се моҳ вақт додааст, то коргарони хориҷиро аз кор озод кунанд.
Инчунин дар вилояти Краснодари Русия низ сар аз соли 2025 ба ҷалби нерӯи кории хориҷӣ дар соҳаи сохтмон маҳдудият ҷорӣ мегардад.
Қаблан, Вениамин Кондратев, губернатори вилоят гуфта буд, ки “вақте мо нерӯи кории хориҷиро манъ кардем, 50 дарсади муҳоҷиронро дар сохтмон ба кор гирифтем. Вале дар соли оянда ин маҳдудият дар соҳаи сохтмон низ амалӣ хоҳад шуд”.
Аз ин пештар низ дар як қатор минтақаҳои Русия фаъолияти муҳоҷирон дар чанд соҳаҳо маҳдуд карда буданд. Аз ҷумла, дар вилояти Иркутск ба шаҳрвандони хориҷӣ бо патент фаъолият намудан дар якчанд соҳаҳои калидӣ аз қабили мусофирбарӣ, тиҷорат ва маорифро манъ карданд.
Дар вилояти Омск низ ба муҳоҷирон кор дар таксӣ, соҳаҳои мусофирбарӣ, тиҷорати маводи ғизоӣ ва нӯшокиҳои спиртӣ, инчунин дар хоҷагии ҷангал ва истеҳсоли доруворӣ манъ мешавад. Соли ҷорӣ дар вилояти Курск низ барои муҳоҷирон кор дар таксӣ манъ гардид.
Қаблан дар зиёда аз 10 минтақа, аз ҷумла вилоятҳои Новосибирск, Самара, Тула, Магадан ва Челябинск ба фаъолияти шаҳрвандони хориҷӣ дар баъзе соҳаҳо маҳдудиятҳо ҷорӣ шуданд.
Маҳдудиятҳои монанд тақрибан дар сеяки минтақаҳои Русия ба роҳ монда шудаанд.
Муҷаввизи кор (патент)-ро дар Русия шаҳрвандони кишварҳое, ки бе раводид (виза) ба Русия мераванд, мегиранд: ба монанди Тоҷикистон, Ӯзбекистон ва Озарбойҷон. Аммо шаҳрвандони кишварҳои узви Иттиҳоди Иқтисодии АвруОсиё (ЕАЭС), ба монанди Арманистон, Беларус, Қазоқистон ва Қирғизистон, аз гирифтани иҷозатномаи корӣ озод ҳастанд.
Бояд гуфт, пас аз ҳодисаи "Крокус" дар Маскав манъи кор дар минтақаҳои алоҳидаи Русия барои муҳоҷирон бештар гардид. Ҳамчунин, баъди ин воқеа фишору таъқиб ба муҳоҷирон ҳам авҷ гирифт.
