Эмомалӣ Раҳмон раиси ҷумҳури Тоҷикистон дар як суҳбати телефонӣ бо Александр Лукашенко, президенти Белорус масъалаҳои кунунии рӯзномаи ҳамкории дуҷонибаро баррасӣ кардааст.
Хадамоти матбуотии президенти Тоҷикистон мегӯяд, суҳбати телефонӣ имрӯз 26-уми феврал сурат гирифт ва дар он ҷонибҳо тадбирҳои минбаъдаро ҷиҳати густариши ҳамкории барои ҳарду ҷониб судманд муайян намуданд.
“Ҳамчунин атрофи масъалаҳои мубрами минтақавӣ ва байналмилалӣ табодули афкор анҷом ёфта, аҳамияти идомаи ҳамкории судманд дар чаҳорчӯби созмонҳои байналмилалӣ ва минтақавӣ таъкид гардид”, – гуфта мешавад дар хабарномаи хадамиоти матбуотӣ.
Тибқи иттилои Вазорати корҳои хориҷӣ, Тоҷикистон муносибатҳои дипломатиро бо Белорус 5 сентябри соли 1996 барқарор намудааст.
Соли 1997 сафорати Тоҷикистон дар Белорус таъсис ёфта, соли 2011 дар шаҳри Душанбе сафорати Белорус дар Тоҷикистон ба фаъолият шурӯъ кард.
Санадҳои бунёдгузоре, ки принсипҳои асосии муносибатҳои дуҷонибаро байни ду кишвар муайян менамоянд, Аҳдномаи дӯстӣ ва ҳамкорӣ байни Тоҷикистон ва Белорус аз 5 апрели соли 2000 ва Аҳдномаи шарикии стратегӣ байни Тоҷикистон ва Белорус аз 27 июни соли 2019 ба ҳисоб мераванд.
Дар маҷмӯъ, байни Тоҷикистон ва Белорус зиёда аз 100 аҳднома ва созишнома ба имзо расидааст, ки барои пешбурд ва таҳкими муносибатҳои мутақобилан судманд дар соҳаҳои сиёсӣ, иқтисодиву тиҷоратӣ, фарҳангию гуманитарӣ ва дигар соҳаҳо созгор мебошанд.
