Вазорати дифоъи Тоҷикистон аз иҷрои нақшаи даъвати ҳарбии баҳорӣ хабар дод. Ин ниҳод гуфт, нишондиҳандаи давъват дар як моҳ “пеш аз муҳлат” 100% иҷро шуд.
Даъвати баҳорӣ дар кишвар 2 моҳ идома мекунад ва ҷавонони синни аз 18 то 27 сола ба артиш ҷалб мешаванд.
Вазорати дифоъ гуфтаст, ки иҷрои пурраи даъвати ҳарбӣ пеш аз муҳлат “натиҷаи ҳамкории доимии мақомот бо мардум, гузаронидани омӯзиши пешаздаъватӣ, ташкили як қатор чорабиниҳои тарғиботиву ташвиқотӣ, тақвият бахшидани корҳои фаҳмондадиҳӣ миёни аҳолӣ дар шаҳру ноҳияҳо, ҷамоату деҳшӯроҳо ва баланд гардидани масъулияти ҷавонписарону волидони онҳо мебошад”.
Вале коршиносон мегӯянд, тибқи қонуни нави уҳдадорҳои ҳарбӣ мақомот ҳақ пайдо карданд, ки тамоми сол ҷавононро ба артиш ҷалб кунанд ва маҳз ин чиз сабаб мешавад, ки онҳо нақшаро дар рӯзҳои аввали маъракаи даъват иҷро кунанд.
Қаблан, Вазорати мудофиа хабар дода буд, ки дар 10 рӯзи маъракаи даъват он 80% иҷро шудааст.
Аз ин пештар, ВМКБ, вилояти Хатлон, минтақаи Рашт ва шаҳри Душанбе аз иҷрои пурраи нақшаи даъвати ҷавонон ба артиш хабар дода буданд.
Мавсими баҳории даъват ба артиш дар Тоҷикистон аз 1-уми апрел оғоз шуд ва он то охири моҳи май давом мекунад. Имсол тибқи фармони раиси ҷумҳури Тоҷикистон ҷавонони аз 18 то 27 сола (солҳои таваллуди 1998-2007) ба артиш ҷалб мешаванд.
Ҳамасола бо шуруъи маъракаи давъати ҳарбӣ мавзӯи ҷалби ҷавонон ба артиш дар Тоҷикистон доғ мешавад. Шароити номуносиб, бадрафторӣ бо сарбозон, меҳтарсолорӣ ва марги ҷавонон дар қисмҳои ҳарбӣ аз сабабҳои аслии саркашии ҷавонон аз хидмат дар артиши Тоҷикистон гуфта мешавад.
Дар ҷараёни маъракаи даъват ба сафи Артиш ҳамеша аз сарбозшикор ё “облава” низ хабару наворҳо нашр мегарданд. Агар мавриди “сарбозшикор” қарор гирифтед, чӣ бояд кард? Ба саволҳои худ дар матлаби “Сарбозшикор”. Чӣ бояд кард, агар “облава” шудед? посух гиред.
