Покистон субҳи имрӯз, 10-уми май, хабар дод, ки амалиёти густурдаи низомӣ алайҳи Ҳиндустонро оғоз кардааст.
Ин кишвар амалиёти худро “Бунён-ун-Марсус” (“Сутуни мустаҳкам”) унвон дода, иддаъо кардааст, ки ба чанд пойгоҳи артиши Ҳинд ҳамла кардааст.
Аз ҷумла, Покистон мегӯяд, як анбори нигаҳдории мушакҳои ҳиндии "Brahmos", пойгоҳи нерӯҳои ҳавоии Патанкут ва истгоҳи нерӯҳои ҳавоии Удҳампурро дар Ҳиндустон ҳадаф қарор додааст.
Ҳамчунон, артиши Покистон иддаъо кардааст, ки низоми дифоии С-400-и Ҳиндустонро вайрон кардааст. Ин низоми дифоиро Ҳиндустон аз Русия харидааст.
Ба гуфаи мақомҳои амниятии Покистон, ин кишвар як ҳамлаи киберӣ низ анҷом додааст, ки дар пайи он сомонаҳои муҳими Ҳинд рахна ва барқи чанд минтақаи он қатъ шудааст.
Аммо Вёмика Синг, сардори ситоди нерӯҳои ҳавоии Ҳинд ва Викром Мисрӣ, вазири хориҷаи ин кишвар иддаои Покистон дар бораи хисорот ба зерсохторҳои низомии Ҳиндро рад карда, гуфтаанд, ки Покистон корзори иттилооти нодурустро роҳандозӣ кардааст.
Артиши Ҳиндустон ҳамлаҳои Покистонро, “афзоиши ошкори танишҳо” хондааст. Ҳиндустон мегӯяд, ҳамлаҳои Покистон бо ҳавопаймоҳои бесарнишин ва дигар муҳимоти ҷангӣ дар марзҳои ғарбии Ҳинд идома доранд.
Артиши Ҳиндустон иддаъо кардааст, ки баъди ҳамлаи Покистон чанд паҳподи ин кишварро нобуд кардааст.
Маълум нест, ки дар ҳамлаҳои охири ду тараф теъдоди захмиёну кушташудаҳо чӣ қадар аст. Танҳо Ҳиндустон эълон кард, ки дар пайи тирборони артиши Покистон як афсари баландпояаи ҳиндӣ дар Кашмири таҳти идораи Ҳиндустон кушта шудааст. Хабаргузории ББС бо такя ба манбаъҳои худ аз кушта шудани ду ғайринизомӣ дар Ҳинд хабар додааст.
Чанд соат қабл аз оғози ҳамлаи худ Покистон гуфта буд, ки артиши Ҳинд шаби гузашта ба се пойгоҳи ҳавоӣ дар Покистон, аз ҷумла ба пойгоҳи ҳавоии "Нурхон" наздик ба пойтахти ин кишвар, ки дар 30-километрии қасри раиси ҷумҳур, бинои парлумон ва хонаи нахуствазир қарор дорад, мушак партоб кардааст.
Дар ҳамин ҳол, Идораи фурудгоҳҳои Покистон ҳарими ҳавоиии ин кишварро барои тамоми парвозҳои ҳавопаймоҳо то нисфирӯзӣ (ба вақти маҳаллӣ) бастааст.
Идораи фурудгоҳҳои Ҳиндустон ҳам эълом кардааст, ки фаъолияти 32 фурудгоҳ дар қисми шимолу ғарби ин кишварро то субҳи 15 май қатъ кардааст.
Муноқиша миёни Ҳинду Покистон ҳафтаи гузашта, замоне авҷ гирифт, ки Ҳиндустон шаби 7 ба 8-уми май амалиёти “Синдур”-ро оғоз карда, ба қаламрави Покистон ҳамла анҷом дод. Баъди ин дар марзи ду кишвар даргириҳо идома ёфт.
То кунун, ба гузориши расонаҳо, аз ду тараф беш аз 50 нафар кушта шудааст.
Танишҳо миёни Ҳинду Покистон, ки ҳарду силоҳи ҳастаӣ доранд, моҳи гузашт ба дунболи кушта шудани 26 нафар дар ҳамлае дар минтақаи сайёҳии Паҳалгам дар Кашмири таҳти идораи Ҳиндустон оғоз шуд. Ҳинд ҳамсояи худро ба ҳимоят аз ин ҳамла муттаҳам кард. Покистон ин итиҳомро рад карда, хостори таҳқиқи мустақил шуд.
