Вазирони корҳои хориҷии Тоҷикистону Эрон – Сироҷиддин Муҳриддин ва Аббос Ароқчӣ дар Теҳрон вохӯрдаанд.
Ин дидор имрӯз, 17-уми май дар ҳошияи чаҳорумин Маҷмаи гуфтугӯи Теҳрон баргузор гардида, дар он масоили амниятӣ, иқтисодӣ, тиҷорӣ ва фарҳангӣ баррасӣ шудаанд. Аммо ҷузъиёти мушаххаси ин гуфтугӯҳо дастрас нест.
Ба навиштаи хабаргузории ИСНА дар ин мулоқот таҳаввулоти ахири минтақаӣ ва ҷаҳонӣ ҳам баррасӣ шуда, ҷонибҳо аз вазъи Ховари Миёна изҳори нигаронӣ кардаанд.
Ба гуфтаи манбаъ, ҷонибҳо ба зарурати идомаи ҳамкориҳои минтақаӣ, бахусус дар масъалаи Афғонистон таъкид кардаанд.
Ёдрас мешавем, ки Сироҷиддин Муҳриддин рӯзи гузашта вориди Теҳрон шуд. Ӯ дар ин сафар қарор аст бо Масъуд Пизишкиён, раиси ҷумҳури Эрон ҳам дидор анҷом дода, дар чаҳорумин Маҷмаи гуфтугӯи Теҳрон, ки аз 17 то 19-уми май баргузор мегардад, ширкат кунад.
Маҷмаи гуфтугӯи Теҳрон соли 2017 таъсис ёфта, як майдон барои мулоқот ва музокира мебошад, ки барои таҳкими ҳамкориҳо, табодули назарҳо ва ҳалли мушкилоти минтақавӣ ва ҷаҳонӣ таъсис ёфтааст. Ин маҷма ба кишварҳо ва ниҳодҳои гуногун имкон медиҳад, ки дар муҳити дӯстона ва бидуни танқидҳои шадид бо ҳам мубодилаи афкор кунанд.
