Дар вилояти Нижний Новгороди Русия мамнуияти ба кор қабул кардани муҳоҷирони дорои иҷозатномаи корӣ ё “патент” дар соҳаи хӯрокворӣ бекор карда шудааст.
Дар ин бора хабаргузории русии РБК бо такя ба дастгоҳи ҳомии ҳуқуқи тиҷоратии ин вилоят хабар додааст.
Бар асоси ин тағйирот ба қарори раиси вилояти Нижний Новгород, маҳдудияти кор барои муҳоҷирон дар соҳаҳои нақлиёт, меҳмондорӣ, ҷамъовариву коркарди партов ва чанд соҳаи дигар ҳам бекор шудаанд.
Тасмими бекор кардани манъи кори муҳоҷирон дар ин соҳаҳо дар пайи муроҷиатҳои зиёди соҳибкорон, ки аз норасоии қувваи корӣ шикоят кардаанд, гирифта шудааст.
Бояд гуфт, фармони манъи кори муҳоҷирон тавассути "патент" дар вилояти Нижний Новгород дар чандин бахш моҳи марти соли ҷорӣ содир шуда буд.
Қаблан, ҳукумати шаҳри Санкт-Петербурги Русия қарори қаблан эълоншуда дар бораи манъи кори муҳоҷиронро дар соҳаи таксӣ ва боррасонӣ (курйер)-ро бозбинӣ намуда, зараровар будани ин тарҳро эътироф карда буд.
Бино ба арзёбии коршиносон, манъи пурра метавонист ба болоравии нархҳо ба хидматрасониҳо дар Санкт-Петербург ва душвор шудани дастрасӣ ба дарёфти онҳо оварда расонад.
Ҳамчунин, Вениамин Кондратев, волӣ ё губернатори вилояти Краснодар дар қароре аз 25 июни соли 2025, кор барои муҳоҷирон дар сохтмонро то 20 декабри соли 2025 иҷозат дода буд.
Бояд гуфт, ки дар бозори кори Русия норасоии шадиди қувваи корӣ ба мушоҳида мерасад.
Борис Титов, намояндаи махсуси президенти Русия оид ба ҳифзи ҳуқуқҳои соҳибкорон чанде пеш изҳор намуд, ки талаботи Русия ба муҳоҷирон дарвоқеъ баланд буда, камбуди қувваи корӣ бошад, ба нуқтаи буҳронӣ расидааст.
