Хадамоти муҳоҷирати Вазорати меҳнат, муҳоҷират ва шуғли аҳолии Тоҷикистон шаҳрвандони кишварро ба омӯзиши забони ҷопонӣ барои кори минбаъда дар Ҷопон даъват кардааст. Аз ин ниҳод ба “Азия-Плюс” гуфтанд, сабтином аллакай оғоз гардида, беш аз ду ҳафта идома мекунад.
Ба иттилои манбаъ, дар ин давра танҳо 60 нафар дар курсҳои омӯзиши забон саб ва се моҳ омӯзиш дода мешаванд. Манбаъ мегӯяд, яке аз шартҳои асосии кор дар Ҷопон ин донистани забони ҷопонӣ дар сатҳи муошират аст.
Гуфта мешавад, “шаҳрвандоне, ки ин забонро муваффақона аз худ мекунанд, барои сафарбаршавӣ барои кор дар соҳаҳои гуногун дар кишвари Ҷопон дар соли 2026 ба қайд гирифта мешаванд”.
Манбаъ мегӯяд, ҳамчунин шаҳрвандоне, ки забони ҷопониро медонанд ва ё дар дигар курсҳо омӯзиш гирифтаанд, метавонанд имтиҳон супорида барои кор дар ин кишвар худро сабтином кунанд.
Кор дар кадом соҳаҳост ва музди меҳнат чӣ қадар аст?
Аз Хадамоти муҳоҷират ба Азия-Плюс гуфтанд, кормандон дар соҳаҳои истеҳсоли маҳсулоти саноатӣ, сохтмон, киштисозӣ ва боркашонӣ, саноати авиатсия, роҳи оҳан, моҳипарварӣ, хоҷагии қишлоқ ва ҷангал ва саноати коркарди чӯб барои кор ба кишвари Ҷопон фиристода мешаванд.
Шаҳрвандони аз 20 то 39-сола, ки доғи судӣ надоранд ва забони ҷопониро дар сатҳи муошират медонанд, метавонанд барои сабтином ва кори минбаъда муроҷиат кунанд.
Ба иттилои манбаъ, шаҳрвандони кишвар соли 2026 ба Ҷопон фиристода мешаванд, аммо ҳанӯз теъдоди онҳо дақиқ нест.
Манбаъ гуфт, музди меҳнат аз 12 доллар дар як соат оғоз шуда, корманд аз ҷониби корфармо бо манзил ва се вақт хӯрок таъмин мешавад. Аммо маблағи раводид ва чипта аз ҷониби худи корманд пардохта мешавад.
Хадамоти муҳоҷират гуфтааст, шаҳрвандоне, ки хоҳиши омӯзиши забони ҷопониро доранд, ба ин ниҳод, воқеъ дар ш. Душанбе, ноҳияи Шоҳмансур, кӯч. С. Айнӣ 121 муроҷиат кунанд ва ё бо рақамҳои 225-05-75; 225-02-21 тамос бигиранд.
Ёдрас мешавем, ки Солеҳа Холмаҳмадзода, вазири меҳнат, муҳоҷират ва шуғли аҳолии Тоҷикистон дар нишасти қаблӣ аз имзои шартнома ба як қатор кишварҳо, аз ҷумла Ҷопон барои ҳамкорӣ дар самти муҳоҷирати меҳнатӣ иттилоъ дода буд. Ӯ таъкид карда буд, ки соли 2024 Вазорат дар соҳаи меҳнат бо 15 кишвар 41 санади ҳуқуқӣ ба имзо расонид. Дар байни онҳо Ҷопон ва Корея, Русия, Беларус, Озарбойҷон, Қазоқистон, Ӯзбекистон, Туркманистон, Эрон, Туркия, Ҳиндустон, Қатар, Кувайт, Амороти Муттаҳидаи Араб ва Чин қарор доранд.
