Боғи ҳайвоноти Душанбе, ки дар маркази пойтахт ҷойгир аст, ба наздикии шаҳри Ҳисор кӯчонида мешавад. Дар ин бора имрӯз, 25-уми июл дар нишасти матбуотии шаҳрдории Душанбе зикр гардид.
Толиб Раҳимзода, муовини раиси шаҳри Душанбе гуфт, “айни замон ҷиҳати ҷудо намудани қитъаи замин дар шоҳроҳи Душанбе-Ҳисор корҳо оғоз гардидааст ва баъди ба анҷом расонидани ҳуҷҷатгузорӣ масъалаи маблағгузории он баррасӣ мегардад”.
Қаблан, шаҳрдории пойтахт канори шимолии Душанбе, наздикии соҳили дарёи Варзобро барои бунёди Боғи ҳайвоноти нав интихоб карда буд.
Аммо Раҳимзода гуфт, он мавзеъро лоиҳакашон барои бунёди Боғи ҳайвонот номувофиқ арзёбӣ карданд ва масоҳаташ низ кам аст.
“Барои бунёди Боғи ҳайвонот масоҳати калонтар лозим аст. Ҷойи нигоҳдории ҳайвонот бояд кушод бошад. Ин Боғи ҳайвоноти имрӯзаи мо мувофиқи стандартҳои замони шӯравӣ сохта шудааст ва ба меъёри он замон мувофиқ буд. Аммо имрӯз мо бояд меъёрҳои ҷаҳониро ба инобат гирем”,- гуфт ӯ.
Дар ҳамин ҳол, Низом Мирзода, раиси Кумитаи меъморӣ ва сохтмон низ кӯчонидани Боғи ҳайвоноти Душанберо тасдиқ кард, вале будуни тафсилоти дигар дар ин бора, аз нашри хабарҳои ба қавли ӯ “ғаразнок” аз вазъи Боғи ҳайвонот эътироз кард.
“Бас кунед ғаразнок навиштанро. Шояд бемасъулиятии роҳбар бошад. Вале ба ҳар сурат имрӯз кор карда истодааст ва дар оянда мекӯчад. Ҳаминро “реклама” карда, ба ҷаҳониён камбудии худро нишон додан магар айб нест?”, – шиква кард Мирзозода.
Бояд гуфт, вазъи Боғи ҳайвонот дар маркази шаҳр солҳо инҷониб нигаронкунанда арзёбӣ мешавад. Фаъолону коршиносон аз шароити бади ҳайвонот, вазъи ғайрисанитарӣ ва хунукназарии маъмурияти боғ нигаронанд.
Дар ҳудуди боғ инчунин тезтайёр, дӯконҳо ва “аттраксион”-ҳои кӯдакона ҷойгиранд. Ба гуфти маъмурияти боғ, барои муассиса ин даромади иловагӣ аст, ки барои хӯроки ҳайвонот ва беҳтар кардани шароити зисти онҳо сарф мегардад.
Ёдрас мешавем, ки масъалаи тахриб ё бозсозии боғи ҳайвонот беш аз 10 сол аст, ки баррасӣ мешавад. Соли 2018 дар шаҳрдории Душанбе ба рӯзноманигорон иттилоъ доданд, ки боғи ҳайвоноти пойтахт ба наздикӣ ба минтақаи атрофи бозори “Корвон” кӯчонида мешавад. Вале аввали соли 2020 шаҳрдорӣ дар бораи ба ҷойи дигар кӯчонидани боғи ҳайвонот қарор қабул кард ва ин маротиба канори шимолии Душанбе, наздикии соҳили дарёи Варзоб, ҷойи ду кӯли ҳозира макони бунёди Боғи нави ҳайвонот интихоб гардида буд.
Соли 2021 шаҳрдории Душанбе ба соҳибкорони дохиливу хориҷӣ пешниҳод кард, ки Боғи ҳайвоноти Душанберо бунёд ва баъдан онро соҳиб шаванд.
