Дастаи мунтахаби футболи Тоҷикистон дар бозии даври дуюми мусобиқаи Ҷоми миллатҳои “CAFA-2025” тими миллии Афғонистонро бо ҳисоби 2:0 шикаст дод. Набарди дастаҳо шоми дирӯз, 1-уми сентябр, дар Варзишгоҳи марказии шаҳри Ҳисор доир шуд.
Ҳисоби рақобатро дар дақиқаи 24-ум футболбози тоҷик Эҳсони Панҷшанбе бо истифода аз зарбаи 11-метар ё “пеналтӣ” боз кард. Баъдан дар дақиқаи 92-юм Шервони Мабатшоев аз паси Эҳсон истифода бурда, голи дуюми дастаи моро ба самар расонд.
Дар рақобати дигари гурӯҳи “В” Эрон бо ҳисоби 3:0 Ҳиндро мағлуб кард.
Тоҷикистон пас аз ин пирӯзӣ муқобили Афғонистон се имтиёз ба даст оварда, дар ҷои сеюми гурӯҳи “В” қарор гирифт. Дар ин гурӯҳ Эрон бо ду ғалаба ва 6 хол садрнишин аст.
Дар даври охири марҳилаи гурӯҳӣ Тоҷикистон муқобили Эрон ва Афғонистон бо Ҳиндустон мубориза мебаранд. Ин бозиҳо рӯзи 4-уми сентябр дар Ҳисор сурат хоҳанд гирифт.
Ёдрас мешавем, ки дар бозии авлаи Ҷоми миллатҳои "CAFA-2025" Тоҷикистон аз Ҳиндустон, ки дар радабандии Федератсияи байналмилалии футбол 27 зина аз дастаи мо поёнтар қарор дорад, бо натиҷаи 0 бар 2 ноком шуд.
Баъди ин нокомӣ, мухлисони футболи меҳан дар шабакаҳои иҷтимоӣ сармураббиро дар интихоби нодурусти ҳайати даста, аз ҷумла, ҳамлагарон гунаҳкор карданд.
Ҳоло атрофи тими мунтахаби кишвар баҳсҳои зиёд вуҷуд дорад. Бархе аз мухлисон тақозо доранд, ки мураббӣ иваз шавад, аммо коршиносон бар ин боваранд, ки ин мушкили печидаи футболи тоҷикро ҳал намекунад.
